गोंदिया (वृत्तसंस्था) गोंदिया वृद्धाला गुप्तधनातून कोट्यधीश होण्याचे स्वप्न दाखवून ७ लाखांची फसवणूक केल्याप्रकरणी देवरी पोलिसांनी मांत्रिकासह दोघांवर अघोरी प्रथा प्रतिबंधक कायद्यान्वये गुन्हा दाखल केला आहे.
नेमकं काय आहे प्रकरण !
देवरी तालुक्यातील खुर्शीपार येथील ग्यानिराम सदाराम उके (८०) यांना गुडघ्याचा त्रास असल्याने औषधीसाठी नातेवाईकांना विचारणा केली. नातेवाईकांनी त्यांना एका मांत्रीकाचा नंबर दिला. त्या मांत्रीकाकडून उके यांनी औषधोपचार केला. त्यात त्यांना आरामही मिळाला. त्यामुळे आरोपी गोपाल वैद्य (५५, रा. पारडीसिंगा ता. काटोल जि. नागपूर) याच्यावर त्यांचा विश्वास बसला. औषधी घेण्यासाठी गेलेल्या ग्यानिराम उके यांना आरोपीने तुझ्या घरी गुप्तधन असल्याचे सांगितले. ते गुप्तधन तुला काढून देतो, त्यासाठी जादूटोणा करणारा एक माझा मित्र आणतो, असे सांगत करोडपती होण्याचे आमिष दिले. त्याच्यावर विश्वास ठेवत ग्यानीराम उके गुप्तधन काढण्यासाठी तयार झाले. यादरम्यान आरोपींनी त्यांच्या जवळून गुप्तधनाच्या नावावर ७ लाख रुपये उकळून जमीनीतून विविध प्रकारच्या पितळेच्या मूर्ती काढत त्यांची फसवणूक केली. या प्रकरणी दोन आरोपींवर महाराष्ट्र नरबळी आणि इतर अमानुष अनिष्ट व अघोरी प्रथा व जादूटोणा यांना प्रतिबंध करणे व त्यांचे समूळ उच्चारण करण्याचे अधिनियम अंतर्गत गुन्हा दाखल करण्यात आला आहे. तपास पोलीस निरीक्षक प्रवीण डांगे करीत आहेत.
जमिनीतून काढल्या २८ मूर्ती व २ झाकण !
गुप्तधन जमीनीतून काढण्याच्या नावावर त्यांच्या घरात खड्डा खोदून एका तांब्याच्या लोट्या १५ पितळेच्या लहान मूर्ती, एक बालकृष्णाची मूर्ती, एका तांब्याच्या हांड्यात गणपतीच्या ५ मूर्ती, देवीच्या ७ मूर्ती, दोन पितळेचे झाकण काढण्यात आले. आरोपीनी नजर चुकवून ते साहित्य जमीनीत गाडून त्यांना जमीनीतून काढत असल्याची बनवाबनवी करण्यात आली.
एक महिन्यापासून सुरू होता प्रकार !
ग्यानिराम सदाराम उके यांच्या घरून गुप्तधन काढण्याची प्रक्रिया ८ सप्टेंबर २०२३ पासून १३ ऑक्टोबर २०२३ या दरम्यान करण्यात आली. तब्बल महिनाभरापासून मांत्रीकाच्या माध्यमातून पूजाअर्चा करून खोदकाम करणे वेगवेगळ्या विधी करण्याचे काम मांत्रीकाने केले.
