जळगाव (प्रतिनिधी) कपाशीच्या शेतात गांजाची झाडे लावले असल्याच्या गुप्त माहितीच्या आधारे जळगाव तालुका पोलिसांनी भोकर परिसरात कारवाई करत एकाविरुद्ध गुन्हा दाखल केला आहे. प्रकाश दशरथ सोनवणे (५८, रा. भोकर, ता. जळगाव), असे संशयित आरोपीचे नाव आहे. ही कारवाई बुधवारी दुपारी चार वाजता तालुका भोकर-पळसोद शिवारात केली.
तालुक्यातील भोकर-पळसोद शिवारात गांजाची शेती केली जात असल्याची गुप्त माहिती पोलिसांना मिळाली. त्यानुसार जिल्हा पोलिस अधीक्षक डॉ. महेश्वर रेड्डी यांनी कारवाईच्या सूचना दिल्या. अपर पोलिस अधीक्षक अशोक नखाते, उपविभागीय पोलिस अधिकारी संदीप गावित यांच्या मार्गदर्शनाखाली तालुका पोलिस ठाण्याचे पोलिस निरीक्षक महेश शर्मा, सपोनि अनंत अहिरे, पोउनि गणेश सायकर, नयन पाटील, पोहेकों दीपक चौधरी, बापू पाटील, किरण अगोणे, चेतन पाटील, प्रवीण पाटील, दिनेश पाटील यांनी घटनास्थळ गाठले. पोलिसांच्या पथकाला शेतात कपाशीच्या पिकात गांजाचे २७ झाडं लावलेली आढळून आली. पोलिसांनी ही झाडं जप्त केली असून १२ किलो वजन व अंदाजे ४० हजार रुपये त्याची किंमत आहे. या प्रकरणी प्रकाश सोनवणे याच्याविरुद्ध गुन्हा दाखल झाला आहे.
