मुक्ताईनगर (प्रतिनिधी) शहरातील भर बाजारपेठेत असलेल्या अंबिका ज्वेलर्स दुकानात अज्ञात दरोडेखोरांनी धाडसी दरोडा टाकत ३० लाखाचे सोने-चांदीचे दागिने लुटून नेल्यामुळे प्रचंड खळबळ उडाली आहे. आज सकाळी ही घटना उघडकीस आली आहे.
शहरातील भुसावळ रोडवर असलेल्या अंबिका ज्वेलर्समध्ये अज्ञात दरोडेखोरांनी रात्री धाडसी दरोडा घातला. अंबिका ज्वेलर्सचे संचालक अनिल शूरपाटणे यांनी दिलेल्या माहितीनुसार, आज सकाळी दुकानात दरोडा पडल्याची माहिती मिळाली. यात सुमारे २५ लाख रूपयांची चांदी तर पाच लाख रूपयांच्या सोन्याचे दागिने चोरट्यांनी लंपास केल्याचे स्पष्ट झाले आहे. या संदर्भात मुक्ताईनगर पोलीस स्थानकाला माहिती दिली असून पंचनामा करून याबाबत गुन्हा नोंदविण्याची प्रक्रिया सुरू करण्यात आली आहे. मुक्ताईनगर पोलिसांनी तात्काळ पावलं उचलत. परिसरात शोधार्थ पथक रवाना केले असल्याची माहिती मिळत आहे.
