जळगाव (प्रतिनिधी) बीएचआर घोटाळ्यात आज सकाळी अटक केलेल्या १२ संशयित आरोपींपैकी तिघांना पुणे न्यायालयात हजर करण्यात आले होते. न्यायालयाने जयश्री तोतला, अंबादास मानकापे आणि प्रेम नारायण कोकटा या तिघांना सहा दिवसांची पोलिस कोठडी सुनावली आहे. दरम्यान, सरकार पक्षाकडून ॲड. प्रवीण चव्हाण यांनी संशयितांना पोलीस कोठडी मिळावी म्हणून जोरदार युक्तीवाद केला.
पुणे न्यायालयात संशयितांना हजर केल्यानंतर सरकारी वकील ॲड. प्रवीण चव्हाण यांनी तिघांना पोलिस कोठडी मिळावी म्हणून प्रभावी युक्तिवाद केला. ॲड. चव्हाण यांनी मुद्दे मांडले की, घोटाळा अत्यंत गंभीर स्वरूपाचा आहे. या तिघा संशयित आरोपींनी 30 टक्क्याप्रमाणे पावत्या विकत घेतल्या. बीएचआर पतसंस्थेत अनेक ठेवीदारांचा कष्टाचा पैसा होता. परंतु आरोपींनी तीस टक्के प्रमाणे पावत्या विकत घेण्यासाठी परिस्थिती निर्माण केली. आणि यातून ठेवीदारांना मोठ्या प्रमाणात लुबाडले. अवसायकाचा कारभार पारदर्शी अपेक्षित होता. परंतु त्यांनी देखील पावत्या 30 टक्क्यात विकण्यासाठी ठेवीदारांना मजबूर केले. त्यामुळे तिघांना पोलीस कोठडीत देण्यात यावी, अशी मागणी ॲड. प्रवीण चव्हाण यांनी केली. त्यावर न्यायालयाने तिघा आरोपींना 22 जून म्हणजेच सहा दिवसांची पोलिस कोठडी सुनावली. दरम्यान अटकेतील जयश्री तोतला यांनी पोलीस कोठडी कमीत कमी देण्यात यावी, अशी विनंती न्यायालयाकडे केली होती.
बीएचआर घोटाळ्यात आज पहाटे जळगाव जिल्ह्यासह राज्यभरातील विविध शहरातून आर्थिक गुन्हे शाखेच्या पथकाने १२ संशयिताना ताब्यात घेतले आहे. त्यात भागवत भंगाळे (जळगाव), छगन झाल्टे (जामनेर), जितेंद्र रमेश पाटील (जामनेर) याला औरंगाबाद येथून ताब्यात घेण्यात आले. आसिफ मुन्ना तेली (भुसावळ), जयश्री मणियार (जळगाव), संजय तोतला (जळगाव), राजेश लोढा (जामनेर), अकोला येथील प्रमोद किसनराव कापसे, प्रितेश चंपालाल जैन (धुळे) अंबादास आबाजी मानकापे (औरंगाबाद) जयश्री अंतिम तोतला (मुंबई), प्रेम नारायण कोकटा, प्रमोद किसनराव कापसे (अकोला) या संशयितांचा समावेश आहे.
अटकेतील या संशयितांपैकी अंबादास बाबाजी मानकापे (औरंगाबाद),जयश्री अंतिम तोतला (मुंबई) आणि प्रेम नारायण कोकटा या तिघांना पुणे न्यायालयात हजर केले असता या तिघांना सहा दिवसाची पोलिस कोठडी सुनावण्यात आली. यावेळी सरकार पक्षाकडून ॲडव्होकेट प्रवीण चव्हाण यांनी जोरदार बाजू मांडली.
