भुसावळ (प्रतिनिधी) हरताळा येथे चक्रधर स्वामींच्या मंदिरात शुक्रवारी पहाटे ५ वाजता दर्शनाला जाऊन, भुसावळला घरी परत येताना, व्यापाऱ्याच्या दुचाकीला कारने मागून धडक दिली. या अपघातात शहरातील नवमहाराष्ट्र स्टोअर्सचे संचालक ललित प्रभाकर नेमाडे यांचा जागीच मृत्यू झाला. तर त्यांच्या पत्नी निता नेमाडे या गंभीर जखमी झाल्या.
ललित नेमाडे हे गेल्या १५ वर्षांपासून नियमित हरताळा येथे दर पौर्णिमेला चक्रधर स्वामींच्या मंदिरात दर्शनासाठी जात होते. शुक्रवारीही पहाटे ५ वाजता ते घरून पत्नी निता नेमाडे यांच्यासह दुचाकीने (एमएच १९ डीएस ३३५६) गेले होते. दर्शन घेऊन परत भुसावळला परत येत असताना फुलगावजवळील उड्डाणपुलावर सकाळी ९.३० वाजेच्या सुमारास त्यांच्या दुचाकीला कारने मागून धडक दिली. त्यामुळे नेमाडे यांची दुचाकी पुलाच्या कठड्यावर आदळली. यात ललित नेमाडे यांचा जागीच मृत्यू झाला. तर त्यांच्या पत्नी निता नेमाडे गंभीर जखमी झाल्या.
