धरणगाव (प्रतिनिधी) येथील विवाहितेचा विहिरीत पाणी काढताना पाय घसरून पडल्याने मृत्यू झाल्याची घटना शनिवारी दुपारी घडली. पुनम राहुल पाटील (रा. मराठे गल्ली, धरणगाव), असे मयत विवाहितेचे नाव आहे.
या संदर्भात अधिक असे की, पाटील परिवारातील सदस्य भोणे शिवारातील आपल्या शेतात कापूस पिकाला खत देण्यासाठी गेले होते. यावेळी पुनम पाटील यांनी पती राहुल यांच्यासह कुटुंबातील इतर सदस्यांना खताच्या गोण्या उचलून दिल्या. त्यानंतर दुपारी दोन ते तीनच्या सुमारास जेवण करण्यासाठी पुढे पांडुरंग पाटील यांच्या विहिरीवर गेली. बराच वेळ झाला म्हणून इतर सदस्य विहिरीजवळ गेले असता पूनम ह्या त्या ठिकाणी दिसल्या नाहीत. म्हणून त्यांनी विहिरीत डोकावले असता पूनम ह्या विहिरीचे पाण्यात बुडलेल्या दिसल्या. पूनम यांना तात्काळ बाहेर काढून धरणगाव ग्रामीण रुग्णालयात आणले असता डॉक्टरांनी त्यांना तपासून मयत घोषीत केले. या प्रकरणी अकस्मात मृत्यूची नोंद करण्यात आली असून पुढील तपास पोउपनिरीसंतोष पवार हे करीत आहेत.
