मुंबई (वृत्तसंस्था) पती राज कुंद्राला अश्लील व्हिडीओ प्रकरणी अटक झाल्यानंतर सोशल मीडिया व प्रसार माध्यमांमधून मानहानीकारक माहिती प्रसिद्ध करण्यास मज्जाव करण्याच्या मागणीसाठी अभिनेत्री शिल्पा शेट्टीने उच्च न्यायालयात धाव घेतली होती. दरम्यान, आज मुंबई उच्च न्यायालयात या याचिकेवर सुनावणी झाली. उत्तर प्रदेशमधील ‘कॅपिटल टीव्ही’नं प्रसिद्ध केलेला आक्षेपार्ह व्हिडिओ व काही यूट्यूबरनी केलेली आक्षेपार्ह विधानं वेबसाइटवरून काढण्याचे निर्देश यावेळी उच्च न्यायालयानं दिले.
शिल्पा शेट्टी हिच्या वतीनं अॅड. बिरेंद्र सराफ यांनी बाजू मांडली. ‘राज कुंद्रा प्रकरणात काही माध्यमांचे वार्तांकन वस्तुस्थितीला धरून नसून त्यात अनावश्यक मतं मांडून शिल्पा शेट्टी यांच्या प्रतिमेला धक्का पोहोचवण्याचा प्रयत्न करण्यात आला आहे. काहींनी तर शिल्पा यांचं मातृत्व आणि लहान मुलांच्या पालनपोषणाविषयीही प्रश्न उपस्थित केले आहेत,’ याकडं अॅड. सराफ यांनी न्यायालयाचं लक्ष वेधलं. त्यावर, ‘कॅपिटल टीव्ही’ आणि ‘फिल्म विंडो’च्या हीना कुमावत यांनी प्रसिद्ध केलेले व्हिडिओ प्रथमदर्शनी बदनामीकारक असल्याचं निरीक्षण खंडपीठानं नोंदवलं व संबंधितांना निर्देश दिले. ‘फिल्म विंडो’च्या संस्थापक हीना कुमावत यांनी शिल्पा शेट्टीविषयी केलेल्या विधानांचा व्हिडिओ इंटरनेटवरून काढला असून यापुढंही तो अपलोड करणार नसल्याची हमी वकिलांमार्फत देण्यात आली.
शिल्पा शेट्टीच्या याचिकेतील मुद्द्यांविषयी सर्व प्रतिवादींनी १८ ऑगस्टपर्यंत प्रतिज्ञापत्रावर उत्तर दाखल करावं आणि त्यावर शिल्पा शेट्टीनं २६ ऑगस्टपर्यंत प्रत्युत्तर दाखल करावं, असे निर्देश न्या. गौतम पटेल यांनी दिले. या प्रकरणी पुढील सुनावणी २० सप्टेंबर रोजी होणार आहे.
वृत्तपत्रांचा खप वाढवण्यासाठी या प्रकरणाशी संबंधित वृत्त अधिक रंजक करून प्रसिद्ध केले जाते, त्यामुळे प्रतिवाद्यांना आपल्याविषयी चुकीचे आणि मानहानी करणारे वृत्त प्रसिद्ध करण्यापासून मज्जाव करण्याची मागणी शिल्पाने याचिकेत केली होती. आपल्याबाबतची चुकीची माहिती संकेतस्थळांवरून काढून टाकावी, सोशल मीडियावरूनही याबाबतचे व्हिडिओ हटवण्यात यावेत, तसेच माफी मागण्याचे आदेश द्यावेत, अशी मागणी शिल्पाने केली होती.
