नागपूर (वृत्तसंस्था) विरोधी पक्षनेते देवेंद्र फडणवीस यांनी राष्ट्रवादीचे नेते आणि मंत्री नवाब मलिक यांचा चांगलाच समाचार घेतला. मलिक दिवसभर बोलत असतात त्यांना दुसरे काम नाही, अशी टीका फडणवीस यांनी केली. तसेच राष्ट्रवादीचा पोपट रोज बोलत आहे ना?, असा चिमटाही त्यांनी काढला आहे.
देवेंद्र फडणवीस यांनी मीडियाशी संवाद साधताना हा टोला लगावला. राष्ट्रवादीचा पोपट रोज बोलत आहे ना? कोण कोणाचा पोपट आहे हे तुमच्यासाठी महत्त्वाचे असेल. आमच्यासाठी नाही, असं फडणवीस म्हणाले. नवाब मलिक दिवसभर काही तरी बोलत असतात. आता सध्या त्यांना दुसरं काही काम नाही. त्यामुळे त्यांच्या प्रत्येक विधानावर प्रतिक्रिया देण्याची गरज नाही, असं सांगत फडणवीस यांनी मलिक यांच्या विधानावर अधिक बोलणं टाळलं.
मलिक नेमकं काय म्हणाले?
दरम्यान, राष्ट्रवादीचे प्रवक्ते नवाब मलिक यांनी भाजपवरही जोरदार हल्ला चढवला. येत्या ७ डिसेंबर रोजी अधिवेशन होणार आहे. त्यावेळी माझ्यावर हल्ले केले जातील. माझ्या जावयाला बदनाम करण्याचा प्रयत्न केला. पण आता मी काही बोलणार नाही. मला विषयांतर करायचे नाही. हे जे काही पोपट आहे. त्याचा पोपट केल्यानंतर बरेच्या गोष्टी बाहेर येणार आहेत. हिवाळी अधिवेशनात अनेक मोठी नावे उघड होणार आहे, असं नवाब मलिक यांनी सांगितलं. पोपटाला वाचवण्यासाठी सर्व लोक पुढे पुढे पळत आहेत. पण विधानसभेत सर्व परिस्थिती समोर आल्यानंतर यांना महाराष्ट्राला तोंड दाखवता येणार नाही, तसे माझे प्रयत्न सुरू आहेत, असंही त्यांनी सांगितलं.
