जळगाव (प्रतिनिधी) राज्याचे सामाजिक न्याय मंत्री धनंजय मुंडे यांनी कथित बलात्काराच्या प्रकरणावर स्वतः कबुली दिली आहे. त्यामुळे मुंडे हे निर्दोष आहेत, असे मला वाटते. ते आपले निर्दोषत्व लवकरच सिद्ध करतील, असा विश्वास शिवसेना नेते तथा राज्याचे पाणीपुरवठा मंत्री गुलाबराव पाटील यांनी व्यक्त केला आहे.
जळगाव जिल्हा शासकीय वैद्यकीय महाविद्यालय व रुग्णालयात आज (शनिवारी) सकाळी कोरोना लसीकरणाला गुलाबराव पाटील यांच्या प्रमुख उपस्थितीत प्रारंभ झाला. यानंतर ते पत्रकारांशी बोलत होते. यावेळी ना. पाटील म्हणाले की, धनंजय मुंडे यांनी जनतेसमोर स्वतः कबुली दिली आहे. एखादा माणूस अशी कबुली देत असेल तरीही तुम्ही त्याला चोर ठरवणार काय? त्यांना काही लपवायचे असते तर त्यांनी जाहीरपणे कबुली दिलीच नसती. अशा पद्धतीने राजकारण करून एखाद्याची ३० वर्षांची तपश्चर्या उद्ध्वस्त करू, असे जर कुणाला वाटत असेल तर ते चुकीचे आहे. त्यांची कायदेशीर लढाई सुरू आहे. मात्र, विरोधकांकडून याप्रश्नी नाहक राजकारण केले जात आहे. त्यांचा राजीनामा मागण्याचा अधिकार कोणालाही नाही, असेही ना. पाटील म्हणाले.
