धरणगाव (प्रतिनिधी) शहरातील चोपडा रोडवर शनिवारी गुटख्याचे वाहन पकडण्यात आले होते. या प्रकरणी अटकेतील दोघं संशयितांना न्यायालयात हजर केले असता दोघांना एका दिवसाची पोलीस कोठडी सुनावण्यात आली आहे.
चोपडा विभागीय पोलीस अधिकारी कृषिकेश रावले हे शनिवारी दुपारी अडीच वाजेच्या सुमारास धरणगाव येथे नियोजित कार्यक्रमासाठी येत होते. याचवेळी क्रीडा संकुलजवळ एक संशयित वाहन त्यांना आढळून आले. वाहनाची तपासणी केली असता, त्यात विमल गुटखा, सिगारेट, सुगंधी सुपारी यासह विविध पदार्थ आढळून आलेत. यावेळी पोलिसांनी संतोष राजेंद्र चौधरी या संशयितास ताब्यास घेतले. संशयितास ताब्यात घेतल्यानंतर विभागीय पोलीस अधिकारी कृषिकेश रावले यांनी त्याच्या घराची देखील झाडाझडती घेतली. त्यात आणखी दोन-तीन पोते भरून माल आढळून आला होता.
याप्रकरणी दोघांविरुद्ध गुन्हा दाखल झाला असून साधारण दीड लाखांचा माल तर एक लाखाचे वाहन असा एकूण २ लाख ३१ हजार ५५० रुपयांचा मुद्देमाल पोलिसांनी जप्त केला होता. या संदर्भात पो.शि. रावसाहेब पाटील यांनी फिर्याद दिली असून संतोष राजेंद्र चौधरी (वय 26, धंदा- पान दुकान, रा. धरणी चौक मराठे गल्ली धरणगाव), सचीन धर्मसिंग बयास (वय 24, धंदा मजुरी, रा. बालाजी गल्ली धरणगाव) या दोघांविरुद्ध गुरनं. /2022 भादवि कलम 188,272,273, 328, 34 सह कलम 59 फुड, सेप्टी अँड स्टन्डर्ड अक्ट 2006 अन्वये गुन्हा दाखल करण्यात आला असून पुढील तपास सपोनि जिभाऊ पाटील हे करित आहेत.
दोघं संशयित आरोपींना आज न्यायालयात हजर केले असता त्यांना न्यायालयाने एका दिवसाची पोलीस कोठडी सुनावली आहे. दरम्यान, गुन्ह्यातील मुद्देमाल संशयित आरोपींनी कुठून आणला आहे?, या गुन्ह्यात आणखी कोणी साथीदार आहेत का? तसेच त्यांनी आणखी कोठे अजून मुद्देमाल लपवून ठेवला आहे का?, याबाबत पोलीस कसून चौकशी करणार आहेत.
