धरणगाव (प्रतिनिधी) येथील अर्बन बँकेत सोमवारी दुपारी पावणे चार वाजेच्या सुमारास एका ७० वर्षीय वृद्धाचे एक लाख रुपये लांबवल्याची घटना घडली. धरणगाव तालुक्यातील जांभोरा येथील आनंदा फकीरा गुजर यांनी मका व कापूस विकून दीड लाख रुपये जमवले होते.
दिवाळीला सुट्टी असल्याने ते दि. ४ नोव्हेंबर रोजी धरणगाव येथील अर्बन बँकेत एका कापडी पिशवीत पैसे घेऊन आले. बँक खात्यात पन्नास हजार रुपये भरण्याची स्लिप भरून उर्वरित एक लाख रुपये त्यांनी पिशवीत ठेवले. त्यांच्या मागे असलेल्या दोन अज्ञात महिलांनी हातचलाखीने पिशवीतील १ लाख रुपये अलगत काढून पोबारा केला. दरम्यान, संपूर्ण घटना सीसीटीव्हीत कैद झाली आहे.
पोलीस निरीक्षक पवन देसले यांनी तात्काळ बँकेतील सीसीटीव्ही फुटेच्या आधारे दोघं संशयित महिलांचा शोध सुरु केला आहे. कारण दोघं महिलांचे बँकेतील वर्तन संशयास्पद होते. तसेच बँकेत कुठलाही व्यवहार न करता दोघं महिला निघून गेल्या होत्या. या प्रकरणी धरणगाव पोलिसात दोन संशयित महिलांवर चोरीचा गुन्हा दाखल करण्यात आला आहे.
