धरणगाव (प्रतिनिधी) : जळगाव जिल्ह्याचे पालकमंत्री तथा राज्याचे पाणीपुरवठा व स्वच्छता मंत्री माननीय नामदार गुलाबरावजी पाटील यांच्या प्रयत्नातून आणि धरणगाव तालुका प्रवासी मंडळाच्या सातत्यपूर्ण पाठपुराव्यामुळे धरणगाव-त्र्यंबकेश्वर मार्ग अमळनेर धुळे मालेगाव नाशिक बस सेवेचा शुभारंभ उत्साहात करण्यात आला.
या कार्यक्रमाचे प्रमुख पाहुणे भाजपा ज्येष्ठ नेते ॲड. संजय महाजन आणि धरणगाव नगरपालिका गटनेते पप्पू भावे हे होते. प्रमुख पाहुण्यांच्या हस्ते नवीन बस सेवेचे उद्घाटन करण्यात आले. तसेच त्यांच्या हस्ते बसचे चालक भूषण मराठे आणि वाहक व्ही. जी. चौधरी यांचा शाल, श्रीफळ व पुष्पगुच्छ देऊन सत्कार करण्यात आला.
धरणगाव बसस्थानकात प्रवाशांसाठी थंड पिण्याच्या पाण्याची व्यवस्था करणारे जलसेवक वाल्मीक धनगर आणि संतोष सोनवणे यांचा धरणगाव तालुका प्रवासी मंडळातर्फे विशेष सत्कार करण्यात आला. तसेच इरफान बागवान आणि शरीफ बागवान यांनी प्रत्यक्ष प्रवाशांना पाणी पाजण्याचे सेवाकार्य केल्याबद्दल त्यांचाही यावेळी गौरव करण्यात आला.
यावेळी ट्रॅफिक इन्स्पेक्टर प्रमोद बाविस्कर यांनी धरणगाव तालुका प्रवासी मंडळाच्या विनंतीनुसार सोमवार, दि. ६ जुलै २०२६ पासून आषाढी एकादशीपर्यंत दररोज सकाळी ७ वाजता धरणगाव-पंढरपूर विशेष बस सेवा सुरू करण्यात येणार असल्याची घोषणा केली.
या प्रसंगी कंट्रोलर भाऊसाहेब पाटील, जितेंद्र सोनवणे, गणेश रावतोळे, व्ही. आर. पोतदार, सचिन पाटील, राजेंद्र न्हायदे, महेश अमृतकर, वीरेंद्र भाटिया, यांच्यासह अनेक मान्यवर उपस्थित होते.
धरणगाव तालुका प्रवासी मंडळाचे अध्यक्ष महेंद्र कोठारी, उपाध्यक्ष रवींद्र भागवत, सचिव एस. डब्ल्यू. पाटील, सहसचिव किरण वाणी, डॉ. मिलिंद डहाळे, किरणसिंह परिहार, दिनकर पाटील, हितेश पटेल, आनंद बाचपाई, ललित येवले, राजेंद्र पडोळ, सुनील चौधरी, सुदाम चौधरी, सुशील कोठारी, हर्षल चव्हाण, बाबा कासार, राजेश मकवाने, डॉ. पंकज अमृतकर, डॉ. स्वप्नील पाटील आणि महम्मद मोईन यांनी कार्यक्रमाच्या यशस्वी आयोजनासाठी परिश्रम घेतले.
कार्यक्रमाचे सूत्रसंचालन राजेंद्र पडोळ यांनी केले. नव्या बस सेवेच्या शुभारंभामुळे धरणगाव आणि परिसरातील भाविक व प्रवाशांमध्ये आनंदाचे वातावरण निर्माण झाले असून, या सेवेचा मोठ्या प्रमाणात लाभ प्रवाशांना होणार आहे.
