अमळनेर (प्रतिनिधी) शहरात गांजा विक्रीसाठी आणणाऱ्या सारबेटे येथील दोघांना पोलिसांनी हेडावे येथे सापळा रचून पकडले आहे. या संशयित आरोपींकडून सुमारे साडेतीन किलो गांजा जप्त करण्यात आला असून या दोघांना अटक करण्यात आली आहे.
पोलीस निरीक्षक विकास देवरे यांना गोपनीय माहिती मिळाली की, तालुक्यातील सारबेटे येथून दुचाकी (एमएच० १९, डीयू ९५४३) ने दोन जण अमळनेर शहरात गांजा विकण्यासाठी आणत आहेत. त्यानंतर देवरे यांनी सहाय्यक पोलीस निरीक्षक रवींद्र पिंगळे, हेडकॉन्स्टेबल सुनील महाजन, हेडकॉन्स्टेबल मिलिंद सोनार, जितेंद्र निकुंभे, अमोल पाटील, विनोद संदानशिव, संतोष नागरे, सागर साळुंखे यांना घेऊन हेडावे गावाजवळ सापळा रचला. सायंकाळी पावणे सहा वाजेच्या सुमारास दोन जण दुचाकी (एमएच १९, डीयू ९५४३) वर येताना दिसले. पोलिसांनी त्यांना अडवले असता त्या दोघांच्यामध्ये पांढऱ्या रंगाची प्लास्टिकची गोणी आढळून आली. त्यात गोणीत गांजा सापडला.
पोलिसांना चौकशीत त्यांनी ते सारबेटे येथील अकील इब्राहिम मेवाती (वय ३७) व मोहसीनखान शरीफखान मेवाती (वय ३२) असे नाव असल्याचे सांगितले. पोलिसांनी शासकीय अधिकाऱ्यांच्या समक्ष गांजाचे मोजमाप केले असता ६८ हजार रुपयांचा ३ किलो ४३२ ग्रॅम गांजा, तसेच ६० हजारांची दुचाकी व १० हजारांचा मोबाईल असा एकूण १ लाख ३८ हजार रुपयांचा मुद्देमाल जप्त करण्यात आला. या प्रकरणी मिलिंद सोनार यांच्या फिर्यादीवरून या दोघांविरुद्ध गुन्हा दाखल करण्यात आला आहे. यात दोन्ही आरोपींना अटक करण्यात आली आहे. तपास सहाय्यक पोलीस निरीक्षक रवींद्र पिंगळे करत आहेत.
