धुळे (प्रतिनिधी) घरगुती कारणासह चारित्र्याच्या संशयावरुन पत्नीचा गळा आवळून खून केल्यानंतर पतीने गळफास घेवून आत्महत्या केल्याची घटना कुंडाणे (वेल्हाणे) ता.धुळे, गावात घडली आहे. या घटनेने परिसरात खळबळ उडाली असून मृत पतीविरुध्द धुळे तालुका पोलीस ठाण्यात खूनाचा गुन्हा दाखल करण्यात आला आहे.
यासंदर्भात, कैलास शामराव पाटील (५०) रा. चिमनपुरी, पिंपळे बुद्रुक, ता. अमळनेर, जि. जळगाव, यांनी तालुका पोलिसात दिलेल्या फिर्यादीत म्हटले आहे की, दि.६ रोजी रात्री १२ ते पहाटे ५.३० वाजेच्या दरम्यान कुंडाणे (वेल्हाणे ) ता. धुळे, गावात जितेंद्र बालु सोनवणे (३०) याने त्याची पत्नी प्रतिक्षा जितेंद्र सोनवणे (२५) हिचा घरगुती कारणासह चारित्र्याच्या संशयावरुन तिचा गळा आवळून खून केला. त्यानंतर जितेंद्र सोनवणे याने स्वतः स्वयंपाक घरातील स्लॅबच्या कडीला दोरीच्या सहाय्याने गळफास घेवून आत्महत्या केली.
आत्महत्येपूर्वी जितेंद्र याने त्याच्या भावास आत्महत्या करीत असल्याबाबत मोबाईलवर संदेश पाठविला होता. संदेश पाहताच भावाने त्याच्या मित्रांना याबाबत माहिती देवून घरी जाण्यास सांगितले होते. मित्र घरी पोहचले तेव्हा दोघेही गळफास घेतलेल्या अवस्थेत आढळून आले. मृत जितेंद्र व प्रतिक्षा या दोघांना दोन मुले आहेत. या घटनेमुळे कुंडाणे गावात हळहळ व्यक्त होत आहे. घटनेची माहिती मिळताच तालुका पोलीस ठाण्याचे पोलीस निरीक्षक दत्तात्रय शिंदे, महिला पोलीस उपनिरीक्षक विजया पवार, हेकॉ सुनील जावरे यांनी घटनास्थळी भेट देवून पाहणी केली. तसेच पंचनामा करुन दोघांचे मृतदेह उत्तरीय तपासणीसाठी जिल्हा रुग्णालयात रवाना केले. याबाबतचे वृत्त आज ‘पुण्य नगरी’ने दिले आहे.
