नवी दिल्ली (वृत्तसंस्था) पंतप्रधान मोदी आणि अमेरिकेचे राष्ट्रपती जो बायडन २४ सप्टेंबरला अमेरिकेची राजधानी वॉग्शिंटन इथं भेटणार आहेत. मात्र, मोदी अमेरिकेला रवाना होताच सोशल मीडियावर उलटसुलट चर्चा सुरू झालीये. याला कारण, पंतप्रधान मोदींनी घेतलेली कोव्हॅक्सिनची लस. या लसीला अद्याप अमेरिकेनं मंजुरी दिलेली नाही. दरम्यान, मोदींनी पुन्हा भारताला मूर्ख बनवलं आहे?, असा सवाल उपस्थित होत आहे.
देशात दुसऱ्या टप्प्यातलं लसीकरण १ मार्चपासून सुरू झालं. पंतप्रधान मोदी सकाळी एम्स रुग्णालयात पोहोचले आणि त्यांनी कोवॅक्सिन घेतली. अमेरिकेनं कोवॅक्सिनला मंजुरी दिलेली नाही. कोवॅक्सिन घेतलेल्यांना अमेरिकेत प्रवेश दिला जात नाही. मोदींनी कोवॅक्सिन घेतलीय आणि अमेरिकेनं त्या लसीला मान्यताच दिलेली नाही. मग मोदी अमेरिकेला कसे जात आहेत, असा प्रश्न अनेकांना पडला आहे.
पंतप्रधान मोदींनी खरंच कोवॅक्सिनच घेतलीय ना, असा प्रश्न आता अनेकजण उपस्थित करत आहेत. अरमान नावाच्या एका व्यक्तीनं ट्विटरवर हा प्रश्न उपस्थित केला आहे. त्याच्या बायोमध्ये काँग्रेस कार्यकर्ता असा उल्लेख आहे. ‘मोदींनी खरंच कोवॅक्सिन घेतली आहे. जागतिक आरोग्य संघटनेनं मान्यता दिलेली लस घेतलेल्या व्यक्तींनाच अमेरिकेत प्रवेश आहे. कोविशील्ड किंवा फायझरची लस घेतली असेल तरच मोदी अमेरिकेचा दौरा करू शकतात. म्हणजे मोदींनी पुन्हा भारताला मूर्ख बनवलं आहे?’, असा सवाल अरमान यांनी विचारला आहे.
