जळगाव (प्रतिनिधी) मुख्यमंत्री एकनाथ शिंदे जळगाव जिल्ह्याच्या दौऱ्यावर असताना त्याआधीच राष्ट्रवादी काँग्रेसचे नेते एकनाथराव खडसे आणि पालकमंत्री गुलाबराव पाटील यांच्यात दिलजमाई झाल्याचे दिसून आले. खडसे यांनी ना. पाटील यांच्यावर दाखल केलेला पाच कोटींचा अब्रु नुकसानीचा दावा आज मागे घेतला.
एकनाथराव खडसे 2016 मध्ये हे मंत्री असताना त्यांच्या विरोधात मंत्री गुलाबराव पाटील यांनी एका भाषणात घोटाळा केल्याचा आरोप केला होता. याबाबत खडसे यांनी जळगाव जिल्हा न्यायालयात मंत्री गुलाबराव पाटील यांच्या विरुद्ध पाच कोटी रुपयांचा अब्रू नुकसानीचा दावा दाखल केला होता. या दाव्यात तारखेवर एकदा मंत्री गुलाबराव पाटील हे गैरहजर राहिले तर दुसऱ्या तारखेवर एकनाथ खडसे व गुलाबराव पाटील हे दोघेही गैरहजर झाले होते. त्यामुळे न्यायालयाने दोघांना प्रत्येकी पाचशे रुपयांचा दंड सुद्धा केला होता.
न्यायालयात अब्रू नुकसानीच्या दाव्यासंदर्भात आज सुनावणी पार पडली. यात खडसे व ना. पाटील या दोघांचे लेखी नोंदवून घेण्यात येऊन दोघांमध्ये तडजोड झाल्याने हा खटला मागे घेण्यात आला आहे. या खटल्यासंदर्भात दोघांमध्ये समजूत झाली असून दोघांच्या गैरसमजतेतून हा दावा दाखल झाला होता. याबाबत दोघांनी न्यायालयात लेखी दिले आहे. दरम्यान, गुलाबरारांसोबत चहा घ्यायला हरकत नाही, आमची काही दुश्मनी नाही. परंतू अशा प्रकारचे आरोप करताना त्यांनी पुराव्यानिशी करावेत, असे खडसे म्हणाले.
