जळगाव (प्रतिनिधी) जळगाव जिल्हा बँक निवडणुकीसाठी पहिल्याच दिवशी म्हणजे सोमवारी १२७ अर्जाची विक्री करण्यात आली आहे. तसेच विद्यमान संचालक व बँकेचे माजी अध्यक्ष चिमणराव पाटील यांनी आपला उमेदवारी अर्ज दाखल केला आहे. १८ ऑक्टोबरपर्यंत उमेदवारी अर्ज दाखल करण्याची मुदत आहे.
जळगाव जिल्हा बँकेसाठी २१ नोव्हेंबर रोजी होणाऱ्या निवडणुकीसाठी सोमवारपासून उमेदवारी अर्ज दाखल करण्यास सुरुवात झाली आहे. पहिल्याच दिवशी १२७ अर्जाची विक्री करण्यात आली असून, विद्यमान संचालक व बँकेचे माजी अध्यक्ष चिमणराव पाटील यांनी आपला उमेदवारी अर्ज दाखल केला असल्याची माहिती निवडणूक निर्णय अधिकारी संतोष बिडवई यांनी दिली.
निवडणुकीत बंडखोरीसोबतच अनेक जण अर्ज दाखल करण्याची शक्यता
जिल्हा बँकेसाठी सोमवारपासून निवडणूक प्रक्रियेला सुरुवात झाली आहे. त्यातच सर्वपक्षीय पॅनल झाल्यामुळे ही निवडणूक बिनविरोध करण्याचा प्रयत्न एकीकडे असताना दुसरीकडे या निर्णयामुळे अनेक जण नाराज झाल्याने या निवडणुकीत बंडखोरीसोबतच अनेक जण अर्ज दाखल करण्याची शक्यता आहे. त्याचाच प्रत्यय सोमवारी दिसून आला. एकाच दिवशी १२७ अर्जाची विक्री झाली असल्याने या निवडणुकीसाठी अनेकांचे अर्ज दाखल होण्याची शक्यता आहे.
सर्वपक्षीय पॅनलकडून चिमणराव पाटलांनी उमेदवारी सर्ज केला दाखल
बँकेचे माजी अध्यक्ष व विद्यमान संचालक चिमणराव पाटील यांनी सर्वपक्षीय पॅनलकडून आपला उमेदवारी अर्ज दाखल केला. त्यांनी सोसायटी मतदारसंघातून हा उमेदवारी अर्ज दाखल केला आहे. पारोळा व एरंडोल मतदारसंघातून प्रत्येकी एक, असे २ अर्ज दाखल केले आहेत. यावेळी बँकेच्या अध्यक्षा अॅड. रोहिणी खडसे, संचालक संजय पवार, भास्कर पाटील, डॉ. दिनकर पाटील, जिल्हा नियोजन समिती सदस्य विजय पाटील, शेतकी संघाचे चेअरमन डॉ. राजेंद्र पाटील, संचालक राजेंद्र पाटील, व्यवस्थापक भरत पाटील, अनिल पाटील आदी उपस्थित होते. सर्वपक्षीय पॅनलबाबत अद्याप अधिकृत घोषणा झाली नसली तरी शिवसेनेकडून चिमणराव पाटील यांनी आपला उमेदवारी अर्ज दाखल करून, जिल्हा बँकेसाठी तयारी सुरू केली आहे.
