चाळीसगाव (प्रतिनिधी) येथील स्वयंदीप संस्थेच्या संस्थापक अध्यक्षा मीनाक्षीताई निकम यांच्या संकल्पनेतून आणि वर्धमान भाऊ धाडीवाल मित्र परिवाराच्या योगदानाने आखतवाडे तालुका पाचोरा येथील बाबूलाल लोटन परदेशी यांची दिव्यांग कन्या लोचना, (सरलाताई) व आखतवाडे तालुका सटाणा येथील कै. सुरेश त्र्यंबक खैरनार यांचे चिरंजीव भुषण यांचा विवाह आज धुळे रोड येथील बालाजी लॉन्स मध्ये मोठ्या थाटात संपन्न झाला.
दिव्यांग बंधू आणि भगिनी साठी सदैव मदतीचा हात देणारे सामाजिक कार्यकर्ते वर्धमान धाडीवाल यांनी गेल्या काही महिन्यांपूर्वीच दिव्यांग भगिनी सरलाताई हिचा विवाह मोठ्या थाटात लावून देण्याचे निश्चित केले होते. त्याच बरोबर दिव्यांग भगिनी आणि बंधू यांचा सामूहिक विवाह सोहळा आयोजित करण्याचा देखील संकल्प केला होता. त्याचाच एक भाग म्हणून आज रविवार दिनांक २७ मार्च रोजी सरलाताई व भुषण यांचा विवाह मोठ्या थाटात संपन्न झाला. या विवाहाची संकल्पना स्वयंदीप संस्थेच्या अध्यक्षा मीनाताई निकम यांनी मांडली होती अनोख्या पद्धतीने मोठ्या थाटात साजरा झालेल्या या विवाहप्रसंगी चाळीसगाव तालुक्यातीलच नव्हे तर राज्यभरातून अनेक मान्यवर मोठ्या संख्येने आशीर्वाद देण्यासाठी उपस्थित होते. समाज कल्याण विभागाचे अधिकारी तसेच सामाजिक शैक्षणिक क्षेत्रातील असंख्य मान्यवरांनी या विवाह समारंभास हजेरी लावून तोंडभरून कौतुक केले.
यावेळी आपले मनोगत व्यक्त करताना मीनाक्षीताई निकम यांनी सांगितले की, एखाद्या दिव्यांग भगिनी चा असा विवाह होणे ही जळगाव जिल्ह्यातील नव्हे तर देशातील पहिली घटना असेल इतका थाटामाटात अशा पद्धतीचा विवाह एखाद्या सामाजिक जाणिवेतून सामाजिक कार्यकर्त्या मार्फत होणेही ही गौरवाची बाब आहे असे सांगितले. अशा प्रकारचे लोक समाजामध्ये पुढे आल्यास समाजातील अनेक दिव्यांग भगिनी आणि बांधव यांना आधार मिळून त्यांचे जगणे सुकर होईल अशा भावना यावेळी अनेकांनी व्यक्त केल्या. वर्धमान धाडीवाल मित्र परिवाराने जरी हा विवाह आयोजित केला असला तरी या प्रसंगी कन्यादान हे पुणे येथील वर्धमान धाडीवाल यांचे व्याही व्याहीण ताई कर्णावट परिवारातर्फे करण्यात आले तर हा संपूर्ण समारंभ यशस्वी होण्यासाठी वर्धमान भाऊ धाडीवाल मित्र परिवाराने परिश्रम घेतले.
