अलिबाग (वृत्तसंस्था) दिवाळीत शिवप्रेमींसाठी खुशखबर आहे रायगड किल्ला पर्यटकांसाठी खुला करण्यात यावा, असे आदेश जिल्हाधिकारी निधी चौधरी यांनी दिले आहेत. तसेच रायगड जिल्ह्यातील सर्व पर्यटनस्थळं खुली करण्यात आली आहे.
दरम्यान, इथे येणाऱ्यांना पर्यटकांसाठी सोशल डिस्टन्सिंग आणि मास्कचा वापर बंधनकारक असणार आहे. कोरोनाच्या पार्श्वभूमीवर रायगडमधील सर्व पर्यटन स्थळं बंद ठेवण्यात आली होती. मात्र आता अनलॉकच्या काळात रायगड पर्यटकांसाठी खुला करण्याची मागणी करण्यात येत होती. अखेर रायगड जिल्ह्यातील सर्व पर्यटनस्थळे खुली करण्यात आली आहे. रायगड जिल्हयातील सर्व गडकिल्ले आणि पर्यटन स्थळे तसेच स्मारके खुली करण्याचे आदेश रायगडच्या जिल्हाधिकारी निधी चौधरी यांनी काढले आहेत. मागील आठ महिन्यांपासून कोरोनाच्या प्रादुर्भावामुळे या सर्व ठिकाणी कोणालाही प्रवेश दिला जात नव्हता. ही ठिकाणे खुली करावीत अशी मागणी विविध संस्था, संघटना, दुर्गप्रेमींकडून केली जात होती. तसेच महाड येथील मनोज खांबे यांनी आमरण उपोषणाचा इशाराही दिला होता. त्यानंतर प्रशासनाने ही स्थळे खुली करण्याबाबत आश्वासन दिले होते. परंतु त्याची पूर्तता होत नव्हती, म्हणून दिवाळीच्या पहिल्या दिवशी आमरण उपोषणाचा इशारा दिला होता. आता जिल्हाधिकारी यांच्या आदेशामुळे रायगड किल्ल्याबरोबरच चवदार तळे व इतर गडकिल्ले या ठिकाणी पर्यटकांना आनंद घेता येणार आहे.
