जळगाव (प्रतिनिधी) जिल्हा कारागृहातील कैद्याने जिल्हा शासकीय रुग्णालयात उपचार घेत असताना कैदी वॉर्डात चादरीने गळफास घेऊन आत्महत्येचा प्रयत्न केल्याची घटना उघडकीस आली आहे. रविंद्र निकम (वय २५) असे कैद्याचे नाव आहे.
यासंदर्भात अधिक असे की, शासकीय रुग्णालयात उपचार घेत असलेल्या न्यायालयीन कोठडीतील रवींद्र निकम या कैद्याने मंगळवारी सकाळी ९ वाजता वॉर्डातील पंख्याला चादरीने गळफास घेऊन आत्महत्येचा प्रयत्न केला. हा प्रकार पोलिसांच्या वेळीच लक्षात आल्याने अनर्थ टळला. या घटनेनंतर रुग्णालय प्रशासनाने वॉर्डातील पंखे काढून घेतले आहेत. निकम याला फिट येण्याचा त्रास आहे. जिल्हा रुग्णालयातील कैदी वार्डात त्याच्यासोबतचे दोन्ही कैदी झोपलेले असताना त्याने हा प्रकार केला. वॉडर्डाबाहेर ड्युटी असलेले पोलीस हर्षल महाजन व विनय पाटील यांनी तातडीने बाहेर त्यांना काढले.
दरम्यान, एमएपर्यंत शिक्षित असलेल्या निकमने घटनेनंतर पोलिसांना सांगितले, तुम्ही घाबरू नका, मी स्वतः अर्ज लिहितो, त्यात आत्महत्येचे कारणही लिहितो. भडगाव तालुक्यातील प्रेम प्रकरण व अत्याचाराचा गुन्हा दाखल झाल्याने तो तणावात आहे.
