मुंबई (वृत्तसंस्था) मी पण वंशवादाचं प्रतीक आहे. पण, मोदीजीही मला संपवू शकणार नाहीत, असं वक्तव्य पंकजा मुंडे यांनी केलं आहे. त्यांच्या या बोलण्यामुळे राजकारणात वेगळ्या चर्चा रंगू लागल्या अशातच राष्ट्रवादी काँग्रेसचे नेते एकनाथ खडसे यांनी पंकजा मुंडे यांची पाठराखण केली आहे.
पंकजांच्या वक्तव्याची पाठराखण एकनाथ खडसेंनी कशी केली, यावरूनही सध्या राजकीय वर्तुळात चर्चा सुरु झाल्या आहेत. तर भाजप नेत्या पंकजा मुंडे यांनी केलेल्या वक्तव्यामुळे थेट पंतप्रधान मोदी यांनाच आव्हान दिल्याची चर्चा राजकीय वर्तुळात आता रंगू लागल्या आहेत. घराणेशाहीवर बोलताना पंकजा मुंडे म्हणाल्या की, मलादेखील राजकीय वारसा आहे. पण कुणा वारशाच्या मदतीने मी राजकारण करते, असं मी म्हणणार नाही. मोदींना वंशवादाचं राजकारण संपवायचं आहे. पण, मोदीजीही मला संपवू शकणार नाहीत, असं वक्तव्य पंकजा मुंडे यांनी केलं आहे.
राष्ट्रवादी काँग्रेस नेते एकनाथराव खडसे यांनी पंकजा यांची भावना अधिक स्पष्ट करून सांगितली आहे. ते पुढे म्हणाले की, ‘अनेक वर्ष मी प्रामाणिकपणे काम केलं असेल तर मला कुणीही पराभूत करू शकणार नाही, अशी त्यांची भावना असेल. कदाचित मोदींचं नाव त्यांनी कोणत्या अर्थाने घेतलं, हे मला सांगता येणार नाही. पण, मोदींना आव्हान दिलं असेल तर ते दुर्दैवी आहे. मोदींना आव्हान दिलं नसेल. त्याचा अर्थ तसा घेतलाही जाऊ नये, अशी प्रतिक्रिया पूर्वीचे भाजप नेते आणि आता राष्ट्रवादीत असलेले एकनाथ खडसे यांनी केलं आहे. पंकजा मुंडे यांनी अनेकवेळा वरिष्ठांवर नाराजी व्यक्त केली तरी त्या प्रामाणिकपणे आपलं काम करत आहेत, असं वक्तव्य एकनाथ खडसे यांनी केलं आहे.
