अबुधाबी (वृत्तसंस्था) अबुधाबी विमानतळाजवळ ड्रोन हल्ला झाला आहे. या हल्ल्यात तिघांचा मृत्यू (Three Dead) झाल्याची माहिती आहे. मृत्युमुखी पडलेल्या तिघांपैकी दोघे भारतीय (Two Indians) नागरिक तर एक पाकिस्तानी नागरिकाचा मृत्यू झाला आहे. या घटनेमुळे विमानतळावर गोंधळ उडाला असून जखमींना उपचारांसाठी हॉस्पिटलमध्ये दाखल केलं जात आहे.
हल्ल्यानंतर झाला स्फोट
अबुधाबी विमानतळ परिसरात अचानक ड्रोनचे हल्ले करण्यात आले. यातील काही ड्रोन हे तेलानं भरलेल्या टँकरवर जाऊन पडले. त्यामुळे टँकरचा स्फोट होऊन या हल्ल्यांची भीषणता अधिकच वाढली. या हल्ल्यात आतापर्यंत सहा जण गंभीर जखमी झाल्याची माहिती विमानतळ प्रशासनाकडून देण्यात आली आहे. अबुधाबी विमानतळाच्या नव्या धावपट्टीचं काम सुरू असणाऱ्या परिसरात एक ड्रोन हल्ला झाला. हे विमानतळ अद्याप कार्यरत नसल्याने तिथे फारशी हानी झाल्याचं वृत्त नाही. हा परिसर रिकामा होता आणि तिथलं काम पूर्ण झालेलं नसल्यामुळे त्या परिसरात नागरिकांची वर्दळ नव्हती. दुसरा स्फोट हा ऑईलचे टँकर उभे असणाऱ्या भागात झाला आणि त्यामुळे टँकरनी पेट घेतला. तेलाच्या टँकरचे जोरदार स्फोट झाल्यामुळे परिस्थितीचं गांभिर्य अधिकच वाढलं.
येमेनमधील उग्रवाद्यांनी घेतली जबाबदारी
हा हल्ला आपणच घडवून आणल्याचं येमेनमधील उग्रवादी गट असणाऱ्या Houthi या संघटनेनं म्हटलं आहे. युएई आणि येमेन यांच्यात २०१५ पासून संघर्ष सुरू असून ही त्याचीच परिणती असल्याचं या संघटनेचं म्हणणं आहे. या प्रकरणी अधिक तपास सुरू आहे.
