जळगाव (प्रतिनिधी) पोलिस मुख्यालयात नेमणुकीला असलेल्या दोन कर्मचाऱ्यांत ड्यूटी लावण्यावरून सोमवारी दुपारी पोलिस अधीक्षक कार्यालयाच्या आवारात शाब्दिक चकमक झाली. या वादाचे पर्यवसान थेट हाणामारीपर्यंत पोहोचल्याची जोरदार चर्चा पोलीस दलात सुरु होती. दरम्यान, याप्रकरणी वरिष्ठांकडे कोणीही तक्रार केलेली नसल्याची माहिती समोर आली आहे.
पोलिस मुख्यालयात मॅगझिन डयूटीवर असलेल्या कर्मचाऱ्याची रुग्णालयात ड्यूटसाठी नेमणूक केली. त्या कारणावरून हा वाद निर्माण झाल्याचे कारण पुढे येते आहे. या कर्मचाऱ्याची सोमवारी साप्ताहिक सुटी असताना त्याची नेमणूक करण्यात आली होती. यावरून त्याने नेमणूक करणाऱ्या कर्मचाऱ्याशी पोलीस अधीक्षक कार्यालयाच्या आवारातच हुज्जत घातली. वाद वाढत जाऊन तो हाणामारीपर्यंत पोहोचला. सहकाऱ्यांनी समजूत काढून वरिष्ठांसमोर नेऊन वाद तात्पुरता मिटवला.
दरम्यान, वाद झालेल्या कर्मचाऱ्यांपैकी एक कर्मचारी रात्री जिल्हापेठ पोलिस ठाण्यात तक्रार देण्यासाठी गेल्याची माहिती मिळाली. याबाबत जिल्हापेठचे पोलीस निरीक्षक बबन आव्हाड यांच्याशी संपर्क साधला असता त्यांनी अशा कोणत्याही प्रकारची तक्रार आली नसल्याचे सांगितले.
