जळगाव (प्रतिनिधी) शेतकऱ्यांसाठी काय दिले, असे म्हणणाऱ्या खासदार उन्मेष पाटील यांचे डोळे फुटले आहेत काय? जबाबदार खासदारांना हे शोभेसे नाही, अशा शब्दात पालकमंत्री ना. गुलाबराव पाटील यांनी खा. उन्मेष पाटील यांच्यावर तोफ डागली आहे.
आमदार किशोर पाटील यांच्या अभिष्टचिंतन सोहळा आयोजित करण्यात आला होता. त्यावेळी ते बोलत होते. ना. पाटील म्हणाले, की विरोधक टीका करतात, त्यांना उत्तर देण्याइतपत त्यांची लायकी नाही. आम्ही कामामुळेच सत्तेत आहोत, हे विरोधकांनी लक्षात घ्यावे. माजी मंत्री व जबाबदार खासदार काहीही बोलतात. जनतेची दिशाभूल करतात. जनता इतकी खुळी नाही. भाजपने अफवा खाते बंद करावे आणि लोकांच्या कामाकडे लक्ष द्यावे. शेतकऱ्यांना आम्ही काय दिले याचा पुरेपूर हिशोब देतो. समोर या, आपली काय बोंब पडली ते ही सांगा, असे खुले आव्हान त्यांनी दिले. तसेच भाजपने आम्हाला नैतिकता शिकवू नये, असे सांगून दोन टर्मला आपण मला वाढदिवशी पालिकेची सत्ता गिफ्ट केली. या वेळीही वाढदिवसानिमित्त मी पालिकेची सत्ता आपणाकडे गिफ्ट म्हणून मागत आहे, असे भावनिक त्यांनी आवाहन केले.
