जळगाव (प्रतिनिधी) शानबाग विद्यालयाने फी अभावी विद्यार्थ्यांचा निकाल रोखून धरल्याप्रकरणी शिक्षणाधिकारी बी.जे.पाटील यांनी शानबाग विद्यालयाला सक्त ताकीद देत आपल्या जयंत प्र. टेंबरे आणि हर्षल सुधाकर घोलाने या दोघां शिक्षकांवर कारवाई करण्याचे आदेश जून महिन्यात दिले होते. परंतू त्यावर शाळा प्रशासनाने कुठलीही कारवाई न केल्यामुळे शेवटी शिक्षणाधिकाऱ्यांनी शाळेचे अध्यक्ष आणि सचिवांना पत्र पाठवून दोषी शिक्षकांवर काय कारवाई केली?, याचा अहवाल अहवाल तात्काळ सादर करण्याचे आदेश दिले आहेत. एवढेच नव्हे तर, पंचायत समितीच्या गटशिक्षणाधिकाऱ्यांनाही शाळेवर कारवाई करण्यासाठी आरटीई तरतुदीनुसार प्रस्ताव स्वयंस्पष्ट शिफारशीसह दोन दिवसात सादर करण्याचे आदेश दिले आहेत.
काय आहे नेमकं प्रकरण
कोरोनामुळे वर्षभर ऑनलाईन शिक्षणात सरले असून या शैक्षणिक सत्राचा निकाला जाहीर करण्याच्या सूचना शिक्षण विभागाकडून नसतानाही जळगावातील शानबाग विद्यालयाने ऑफलाईन निकाल जाहीर करुन काही विद्यार्थ्यांना निकालपत्रही वाटप केले होते. तर ज्या विद्यार्थ्यांकडे फी बाकी आहे. त्यांचे निकाल देखील रोखण्यात येत असल्याचा धक्कादायक प्रकार घडला होता. याबाबत सामाजिक कार्यकर्ते तथा एका विद्यार्थ्याचे पालक रवींद्र शिंदे यांनी गटशिक्षणाधिकारी सतीश चौधरी यांच्याकडे भ्रमणध्वनीवरुन तक्रार केली होती. तक्रार दाखल झाल्यानंतर शानबाग विद्यालयाने आपला खुलासा सादर केला होता. तर खुलाशाविरुद्ध मुख्य तक्रारदार रवींद्र शिंदे यांनीही आपले म्हणणे लेखी स्वरूपात गट शिक्षणाधिकार्यांकडे सादर केले होते. गटशिक्षणाधिकारी सतीश चौधरी यांनी याप्रकरणी शाळेतील विविध लोकांचे जाब जबाब नोंदवून घेतल्यानंतर चौकशीअंती शालेय प्रशासन हे दोषी असल्याचे दिसून येत आहे, असा अहवाल दिला होता. त्यानुसार आता शिक्षण अधिकारी बी.जे.पाटील यांनी शानबाग विद्यालयाला सक्त ताकीद देत आपल्या जयंत प्र. टेंबरे आणि हर्षल सुधाकर घोलाने या दोघं शिक्षक कर्मचारींवर कारवाई करण्याचे आदेश दिले होते. परंतू कारवाई न झाल्यामुळे शिक्षणाधिकारऱ्यांनी १९ जुलै रोजी विवेकानंद प्रतिष्ठान संचलीत, कै. ब गो शानभाग विदयालयाचे अध्यक्ष /सचिव तसेच जळगाव पंचायत समितीचे गटशिक्षणाधिकारी यांना पत्र पाठवले आहे.
शानभाग विदयालयाच्या अध्यक्ष /सचिवांना पाठवलेले पत्र
शिक्षणाधिकारी बी.जे.पाटील यांनी शानबाग विद्यालयाच्या अध्यक्ष /सचिवांना पाठवलेल्या पत्रात म्हटले आहे की, उपरोक्त संदर्भीय विषयान्वये विवेकानंद प्रतिष्ठान संचलीत, कै. ब गो शानभाग विदयालय, सावखेडा ता. जि. जळगाव येथील कर्मचारी जयंत टेंभरे व हर्षल सुधाकर घोलाणे या कर्मचा-यांवर आपल्या स्तरावरून काय कार्यवाही झाली याबाबतचा अहवाल तात्काळ या कार्यालयास उलट टपाली सादर करावा.
जळगाव पंचायत समितीचे गटशिक्षणाधिकाऱ्यांना पाठवलेले पत्र
शिक्षणाधिकारी बी.जे.पाटील यांनी जळगाव पंचायत समितीचे गटशिक्षणाधिकाऱ्यांना पाठवलेल्या पत्रात म्हटले आहे की, उपरोक्त संदर्भीय विषय क्र. १ अन्वये आपणाकडून कै. श्रीमती ब गो शानभाग विदयालय, सावखेडा ता. जि. जळगाव या शाळेतील विदयार्थ्याचा निकाल फी साठी राखून ठेवण्याबाबत चौकशी अहवाल या कार्यालयास सादर केलेला आहे.
सदर अहवालानुसार शालेय प्रशासन दोषी असल्याचे नमूद करून संबंधित शाळेत भविष्यात अशी नाव घडणार नाही असे आपण नमूद केलेले आहे. मात्र आपण अहवालात शालेय प्रशासन दोषी असल्याचे नमूद करून पुढील कार्यवाही करण्याचा प्रस्ताव या कार्यालयाकडे पाठविले आहे. तरी सदर शाळेवर कारवाई करण्यासाठी आरटीई तरतुदीनुसार सदर शाळेच्या प्रस्ताव आपल्या स्वयंस्पष्ट शिफारशीसह दोन दिवसात सादर करावा.
