मुंबई (वृत्तसंस्था) शिवसेना नेते आणि कॅबिनेट मंत्री एकनाथ शिंदे यांनी पक्षातील नाराज आमदारांना घेऊन बंडाचं निशाण फडकावलं आहे. शिवसेनेतील काही आमदारांसह एकनाथ शिंदे हे थेट सुरतला दाखल झाल्याने ते पक्ष सोडणार का, अशी चर्चा सुरू होती. हा सर्व राजकीय गदारोळ सुरू असतानाच एकनाथ शिंदे यांनी ट्वीट करत आपली भूमिका स्पष्ट केली आहे.
“आम्ही बाळासाहेबांचे कट्टर शिवसैनिक आहोत… बाळासाहेबांनी आम्हाला हिंदुत्वाची शिकवण दिली आहे.. बाळासाहेबांचे विचार आणि धर्मवीर आनंद दिघे साहेबांची शिकवण यांच्याबाबत आम्ही सत्तेसाठी कधीही प्रतारणा केली नाही आणि करणार नाही,” असे एकनाथ शिंदे यांनी आपल्या ट्विटमध्ये म्हटले आहे.
याआधी नॉट रिचेबल असलेल्या एकनाथ शिंदे यांनी मुख्यमंत्री उद्धव ठाकरे यांना तीन प्रस्ताव दिल्याची चर्चा होती. शिवसेनेनं काँग्रेस आणि राष्ट्रवादी काँग्रेसची साथ सोडावी आणि भाजपासोबत सरकार स्थापन करावं, असा पहिला प्रस्ताव एकनाथ शिंदे यांनी मुख्यमंत्र्यांना दिला आहे. तर आगामी नवीन सरकारमध्ये भाजपाचे नेते देवेंद्र फडणवीस मुख्यमंत्री असतील आणि एकनाथ शिंदे उपमुख्यमंत्री असतील, असा दुसरा प्रस्ताव आहे. उपमुख्यमंत्रीपद मिळालं तरच एकनाथ शिंदे गट शिवसेनेत राहील, असा तिसरा प्रस्ताव असल्याची माहिती समोर येत आहे. याबाबतचं एका वृत्तसंस्थेन वृत्त दिलं आहे.
