नागपूर (वृत्तसंस्था) महालक्ष्मी पूजनानिमित्त घरी आलेल्या तरुणाचा साफसफाई करताना विजेचा जबर धक्का लागून मृत्यू झाल्याची हृदयद्रावक घटना पाटणसावंगी येथे मंगळवारी (दि. १९) सायंकाळी ६ वाजेच्या सुमारास घडली. महेंद्र शिवहरी पांडे ( वय ३७, रा. किल्लापुरा, पाटणसावंगी, ता. सावनेर) असे मृताचे नाव आहे.
महेंद्र पांडे नागपूर शहरात खासगी नोकरी करायचे व पत्नी आणि पाच वर्षीय मुलासह नागपुरात राहत होते. तर म्हातारे आई व वडील पाटणसावंगी येथे राहतात. महेंद्र हे आपल्या परिवारासह महालक्ष्मी पूजनासाठी गावी आले होते. घरी कार्यक्रम असल्याने मंगळवारी त्यांनी घराची साफसफाई हाती घेतली. परंतू नकळत त्यांचा विजेच्या उघड्या तारेला स्पर्श झाला. यामुळे त्यांना विजेचा जोरात धक्का लागला आणि ते खाली कोसळले. घरातील लोकांनी आरडाओरडा केल्यानंतर शेजाऱ्यांनी त्यांना लगेच नागपूर शहरातील मेयो रुग्णालयात नेले. परंतू तिथे डॉक्टरांनी तपासणीअंती त्यांना मृत घोषित केले.
