चाळीसगाव (प्रतिनिधी) लग्नासाठी आलेल्या एकाचे साडे सहा लाखाचे सोन्याचे दागिने अज्ञात चोरट्यांनी चोरून नेल्याची घटना चाळीसगाव तालुक्यातील रोकडे येथे घडली. याप्रकरणी चाळीसगाव ग्रामीण पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
यासंदर्भात अधिक असे की, पंढरीनाथ गंगाराम पाटील (वय-५१ रा. गोंडगाव ता. भडगाव जि. जळगाव ह.मु. उल्हासनगर जि. ठाणे) हे चाळीसगाव तालुक्यातील रोकडे येथील धनराज उत्तम पाटील यांच्या घरी लग्नाच्या निमित्ताने १९ डिसेंबर रोजी सायंकाळी ७ वाजता आले होते. लग्न आटोपून ते धरणगाव तालुक्यातील एका नातेवाईकांकडे गेले होते. त्यावेळी त्यांनी त्यांच्या पत्नीचे साडेसहा लाखाचे सोन्याचे दागिने एका बँगमध्ये ठेवले होते. ते दागिने अज्ञात चोरट्यांनी चोरून नेले. यासंदर्भात त्यांनी शोधाशोध केली परंतु दागिने मिळून आले नाही. याबाबत पंढरीनाथ पाटील यांच्या फिर्यादीवरून चाळीसगाव ग्रामीण पोलीस ठाण्यात अज्ञात चोरट्यांवर गुन्हा दाखल करण्यात आला आहे. पुढील तपास सहाय्यक पोलिस निरीक्षक रमेश चव्हाण करीत आहेत.
