बोदवड (प्रतिनिधी) शहरातील एका व्यावसायिकाकडे दुकान चालू ठेवण्यासाठी १ हजाराची खंडणी मागितल्याप्रकरणी बोदवड पोलिसात एकाविरुद्ध गुन्हा दाखल करण्यात आला आहे.
या संदर्भात अधिक असे की, शहरातील जामनेर रोडवर शांताराम सुरेश शेळके (वय ४०) यांचे झेरॉक्सचे दुकान आहे. दि. ३ जानेवारी रोजी सायंकाळी ७ वाजेच्या सुमारास वसंता अशोक सोनवणे (रा. भिलवाडा, बोदवड) याने शांताराम शेळके यांना अश्लिल शिवीगाळ करत तुला जास्त माज आलाय का?, तुला तुझं दुकान सुरु ठेवण्यासाठी मला दर हप्त्याला एक हजार रुपयाचा हप्ता द्यावा लागेल. तसेच सदर प्रकाराबाबत कोणाला काही सांगितले तर तुला सोडणार नाही, अशी धमकी दिली. याआधी देखील वसंता सोनवणे याने शांताराम शेळके यांच्याकडून दुकान सुरु ठेवण्यासाठी खंडणी घेतली असल्याचे देखील फिर्यादीत म्हटले आहे. याप्रकरणी बोदवड पोलिसात गुन्हा दाखल करण्यात आला असून पुढील तपास स.फो. सुधाकर शेजोळे हे करीत आहेत.
