मुंबई (वृत्तसंस्था) ‘चेहरा क्या देखते हो’, ‘ऐसी दिवानगी देखी नहीं कही’, ‘घुंगट की आड से’ यासारख्या नव्वदच्या दशकातील सदाबहार गाण्यांनी रसिकांच्या मनावर मोहिनी घालणाऱ्या बॉलिवूडच्या प्रसिद्ध संगीतकारद्वयी नदीम-श्रवण यांच्यापैकी श्रवण राठोड यांचे निधन झाले. कोरोनावरील उपचार सुरु असताना मुंबईतील रुग्णालयात गुरुवारी रात्री ९.३० वाजता त्यांनी अखेरचा श्वास घेतला.
मुंबईच्या रहेजा रूग्णालयात त्यांना दाखल करण्यात आलं होतं. ६६ वर्षीय श्रवण व्हेंटिलेटरवर होते. श्रवण यांच्या मृत्यूची बातमी दिग्दर्शक अनिल शर्मायांनी सोशल मीडियाच्या माध्यमातून दिली. ‘अत्यंत दुःख होत आहे. कोरोना व्हायरसमुळे प्रसिद्ध संगीतकार श्रवण आपल्याला सोडून गेले. ‘ असं अनिल यांनी ट्विट करत लिहिलं आहे.
श्रवण यांच्याबद्दल सांगायचं झालं तर, १९९० साली नदीम-श्रवण या जोडीने चाहत्यांना वेड लावलं होतं. नदीम-श्रवण एकत्र गाण्याची चाल तयार करायचे. ‘आशिकी’ चित्रपटाच्या माध्यमातून त्यांना नवी दिशा मिळाली. पण जेव्हा गुलशन कुमार यांच्या हत्येमागे नदीम यांचा हात असल्याचं सांगण्यात आलं तेव्हापासून नदीम-श्रवण यांच्या जोडीला नजर लगाली. नदीम-श्रवण या प्रसिद्ध जोडीने ‘आशिकी’, ‘साजन’, ‘सडक’, ‘दिल है की मानता नहीं’, ‘साथी’, ‘दीवाना’, ‘फूल और कांटे’, ‘राजा हिंदुस्तानी’, ‘जान तेरे नाम’ ‘रंग’, ‘राजा’, ‘धडकन’, ‘परदेस’, ‘दिलवाले’, ‘राज’ अशा अनेक चित्रपटांना संगीत दिलं.
