वाशीम (वृत्तसंस्था) शेतीच्या वादातून युवा शेतकऱ्याच्या डोक्यात लोखंडी रॉडने वार करून हत्या केल्याची घटना घटना बुधवार, ११ ऑक्टोबर रोजी रात्री ८:३० वाजताच्या सुमारास घडली. गजानन उत्तम सपाटे (वय ४५ वर्षे, रा. एरंडा), असे मृताचे नाव आहे. या प्रकरणी जऊळका रेल्वे पोलिसांनी ९ आरोपींवर विविध कलमान्वये गुन्हा दाखल केला आहे.
मृतकाचा भाऊ शिवाजी सपाटे यांनी तक्रार दिली की, मालेगाव तालुक्यातील ग्राम एरंडा येथे फिर्यादी व मृतक गजानन सपाटे यांच्या वडिलांच्या नावे कार्ली शेतशिवारात गट क्रमांक ३१४ मध्ये १४ एकर २३ गुंठे शेती आहे. या शेतीचा वाद कार्ली येथील नारायण सखाराम डुकरे, मधुकर सखाराम डुकरे, किसन सखाराम डुकरे, नर्मदा सखाराम डुकरे यांच्यासोबत न्यायप्रविष्ट आहे. ही शेती गजानन सपाटे वहिती करीत असल्याने त्यांनी या शेतातील सोयाबीनची काढणी केली आणि सोयाबीनचे कट्टे बुधवारी गावातील हनुमान मंदिरावर आणून ठेवले.
दरम्यान, बुधवारी रात्री कार्ली येथील नारायण डुकरे, मधुकर डुकरे, किसन डुकरे, विठ्ठल तातेराव वाघ, गजानन वाघ, नर्मदा डुकरे, सुर्वता डुकरे, ज्योती डुकरे, चंदा डुकरे मंदिराशेजारी आले. त्यावेळी त्यांनी शेतातील सोयाबीनवरून वाद घालून गजानन सपाटे यांना लोखंडी रॉड, काठ्या व लाथाबुक्क्यांनी मारहाण केली.
यावेळी शिवाजी सपाटे व मृत शेतकऱ्याची पत्नी चित्रा सपाटे यांनी पाहिल्याने ते मदतीसाठी धावले. मात्र, या मारहाणीत गजानन यांना गंभीर दुखापत झाल्याने त्यांचा मृत्यू झाला. नंतर मारेकरी सोबत आणलेल्या वाहनाने पळून गेले. अशा आशयाच्या फिर्यादीवरून पोलिसांनी नऊ जणांविरुद्ध खुनाचा गुन्हा दाखल केला आहे. घटनेत सहभागी असलेल्या चार महिलांना पोलिसांनी ताब्यात घेतले असून, इतर आरोपींना ताब्यात प्रक्रिया सुरू होती. याबाबतचे वृत्त आज स्थानिक दैनिकांनी दिले आहे.
