जळगाव प्रतिनिधी । चाळीसगाव तालुक्यातील भोरस येथील रस्त्यांचे कामाचे मोजमाप करून बिले मंजुर करण्‍यासाठी २० हजार रूपयांची लाचेची मागणी करून ती दुसऱ्‍या व्यक्तीच्या माध्यमातून स्विकारल्याच्या प्रकरणात आज (दि.२५) रोजी न्यायाधीश पी.वाय.लाडेकर यांनी आरोपींना दोषी ठरवत सक्तमजुरीची शिक्षा सुनावली आहे.
सुत्रांनी दिलेल्या माहितीनुसार, अभियंता राजेंद्र गणपत मोरे (५४, रा. चाळीसगाव) आणि शेषराव ऊर्फ भोला अहिरराव (५३, खेडी खुर्द, ता.चाळीसगाव) अशी दोन्ही आरोपींची नावे असून त्यात लाचेची मागणी करणाऱ्या आरोपी जिल्हा परिषद अभियंताला ४ वर्षाची तर लाच स्विकारणाऱ्यास 3 वर्षाची सक्तमजूरीची शिक्षा सुनावली आहे. त्यात खाजगी पंटर शेषराव अहिरराव याला लाचलुचपत प्रतिबंधक कायदा कलम १२ नुसार ३ वर्ष सक्तमजुरी व पाच हजार रूपये दंडाची शिक्षा सुनावली आहे. दंड न भरल्यास तीन महिने साधी कैदेची शिक्षा सुनावली आहे. तसेच लाचेची मागणी करणाऱ्या राजेंद्र गणपत मोरे यास लाचलुचपत प्रतिबंधक कायदा कलम ७ नुसार तीन वर्ष सक्तमजुरी व पाच हजार रूपयांचा दंड आणि कर्तव्यात कसुर केल्याप्रकरणी लाचलुचपत प्रतिबंधक कायदा कलम १३ (१)(ड) व १३ (२) नुसार चार वर्ष सक्तमजुरी तसेच पाच हजार रूपये दंडाची शिक्षा सुनावली आहे. दोन्ही शिक्षा एकत्र भोगावयाचे आदेश केले असून दंड न भरल्यास तीन महिने साधी कैद अशी शिक्षा सुनावली आहे. याप्रकरणी सरकारपक्षातर्फे ॲड.मोहन देशपांडे यांनी कामकाज पाहिले.
चाळीसगाव तालुक्यातील भोरस येथील सुनील पाटील हे खाजगी ठेकेदाराचा व्यवसाय करून कुटूंबीयांचा उदरनिर्वाह करतात. सन २०१५ मध्‍ये त्यांनी भोरस बुद्रृक ते चाळीसगाव पर्यंतच्या रस्त्याचे काम केले होते. त्यावेळी रस्त्याचे कामाचे मोजमाप करून बिल मंजुर करण्याचे काम जिल्हा परिषदेच्या बांधकाम विभागातील चाळीसगाव उपविभागीय कार्यालयामधील शाखा अभियंता राजेंद्र मोरे यांच्याकडे होते. मात्र, सहा महिन्यांपासून सुनील पाटील यांच्या कामकाजाचे मोजमाप करून बिले मंजुर करण्‍यासाठी २१ जानेवारी २०१५ रोजी शाखा अभियंता मोरे यांनी २० हजार रूपये मोजमाप करून बिले मंजुर करण्‍यासाठी लाचेची मागणी केली. रक्कम मोरे यांनी खाजगी इसम शेषराव अहिरराव याच्या मार्फत स्वीकारली व लाचलुचपत प्रतिबंधक कार्यालयाच्या पथकाने रंगेहात पकडले होते. तपास पूर्ण केल्यानंतर तपासी अधिकारी डी.डी.गवारे यांनी दोषारोप पत्र न्यायालयात दाखल केला होता. त्यानंतर हा खटला न्यायाधीश पी.वाय.लाडेकर यांच्या न्यायालयात चालला. यावेळी सरकारपक्षातर्फे मोहन देशपांडे यांनी चार साक्षीदार तपासले. त्यात तक्रारदार सुनील पाटील, दिगंबर पाटील, तत्कालीन जि.प.सीईओ आस्तिककुमार पांडेय व तपास अधिकारी डी.डी.गवारे यांच्या साक्षी महत्वपूर्ण ठरल्या.
