बोदवड (प्रतिनिधी) मुक्ताईनगर विधानसभा मतदारसंघाचे अपक्ष उमेदवार आपल्या प्रचार ताफ्यासह राजुर गावाजवळ पोहोचल्यानंतर, त्यांच्यावर मोटरसायकलवर आलेल्या तीन हल्लेखोरांकडून गोळीबार करण्यात आला. सुदैवाने कोणीही जखमी किंवा जीवित हानी झाली नाही. मात्र, या प्रकारामुळे बोदवड तालुक्यात भीतीदायक वातावरण निर्माण झाले आहे.
मुक्ताईनगर-बोदवड मतदार संघासाठीचे अपक्ष उमेदवार विनोद सोनवणे यांची बोदवड तालुक्यातील राजूर गावात प्रचार रॅली सुरू असतांना, नांदगाव फाट्याकडून आलेल्या हल्लेखोरांकडून गोळीबार करण्यात आला. हल्लेखोरांची संख्या तीन होती. तथा तिघेही मोटरसायकलवर स्वार होते. त्यातील सर्वात शेवटी बसलेल्या हल्लेखोराने मोटरसायकलवर उभे राहून गोळीबार केल्याचे प्रत्यक्षदर्शींनी सांगितले.
भ्याड हल्ला अनपेक्षित, हल्लेखोर तरुणांचा व्हिडिओ आमच्याकडे : विनोद सोनवणे
सिद्धेश्वर हनुमान शिरसाळा येथून आशीर्वाद घेतल्यानंतर, कार्यकर्त्यांसोबत बोदवड तालुक्यात प्रचाराला प्रारंभ केला. दरम्यान, पावणेतीन वाजे दरम्यान बोदवड मलकापूर रस्त्यावरील राजूर गावाजवळ पोहोचलो असताना, नांदगाव फाटा रस्त्यावरून एका मोटरसायकलवर तिघे तरुण येताना दिसले. मोटरसायकल वरील एक शेवटचा तरुण, उभा राहून पिस्तूल उगारतांना दिसला. दिवाळीतील फटाक्याची पिस्तोल प्रोत्साहित करण्यासाठी दाखवीत असेल, असे विनोद सोनवणे यांना वाटले. मात्र काही कळायचे आत,त्याने बंदुकीतून दोन फायर राऊंड केले. दोन्ही राउंड,विनोद सोनवणे बसलेल्या (एम. एच.19 सी.एफ. 9111) या चार चाकीच्या छतावरून निघून गेले. त्यामुळे अनर्थ टळला. त्यानंतर विनोद सोनवणे यांनी तातडीने बोदवड पोलीस स्टेशन येथे येऊन, अज्ञात हल्लेखोरांच्या विरुद्ध तक्रार दाखल केली. दरम्यान, हल्लेखोर तरुणांचा व्हिडिओ काही कार्यकर्त्यांकडे असल्याची माहिती समोर आली आहे. याशिवाय अन्य काही व्हिडिओ पोलीस तपासकामी निश्चितपणे उपयुक्त ठरतील, असेही विनोद सोनवणे यांनी सांगितले.
घटनास्थळी वरिष्ठ पोलीस अधिकारी दाखल !
अपक्ष उमेदवार विनोद सोनवणे बोदवड पोलीस स्टेशनमध्ये दाखल झाल्यानंतर बोदवड पोलीस निरीक्षक गजानन भोळे, पोलीस उपनिरीक्षक सुजित पाटील तथा सुधाकर शेजोळे यांनी तक्रारदार विनोद सोनवणे यांची रीतसर तक्रार दाखल करून घेतली. आणि अज्ञात हल्लेखोरांच्या विरुद्ध गुन्हा दाखल करण्यात आला. यावेळी पोलीस स्थानकात मुक्ताईनगर पोलीस उपविभागीय अधिकारी राजकुमार शिंदे दाखल झाले. अपक्ष उमेदवार विनोद सोनवणे यांच्याशी चर्चा केल्यानंतर, डीवायएसपी राजकुमार शिंदे यांनी राजूर येथे घटनास्थळी जाऊन पाहणी केल्याचे समजते.
सर्वच राजकीय पक्षाच्या पदाधिकाऱ्यांची पोलीस स्थानकात गर्दी
अपक्ष उमेदवार विनोद सोनवणे यांच्या गाडीवर गोळीबार झाल्याची घटना कळताच, मुक्ताईनगर विधानसभा मतदार संघाच्या राष्ट्रवादी काँग्रेस शरद पवार गटाच्या उमेदवार ऍड. रोहिणी ताई खडसे,ऍड. भैय्यासाहेब रवींद्र पाटील, कैलासभाऊ चौधरी, भारतीय जनता पक्षाचे राजेंद्र फडके,अनंताभाऊ कुलकर्णी, बोदवड भाजपाचे अध्यक्ष मधुभाऊ राणे, तथा विविध राजकीय पक्षांचे पदाधिकाऱ्यांनी पोलीस पोलीस स्टेशन गाठून त्या ठिकाणी भेट दिली.
