नवी दिल्ली (वृत्तसंस्था) नोटीस बजावूनही कमलनाथ यांची निवडणूक प्रचारादरम्यान सुरु असलेली आक्षेपार्ह वक्तव्य थांबली नाहीत, असं सांगत निवडणूक आयोगाकडून त्यांना काँग्रेसच्या स्टार प्रचारकांच्या यादीतून वगळण्यात आलं होतं. त्यामुळे कमलनाथ हे काँग्रेसच्या स्टार प्रचारकांच्या यादीत राहणार आहेत.
निवडणूक आयोगाच्या या आदेशाविरोधात कमलनाथ यांनी सर्वोच्च न्यायालयात याचिका दाखल केली होती. त्यावर सर्वोच्च न्यायालयानं निवडणूक आयोगाचा आदेश रद्द ठरवला आहे. सर्वोच्च न्यायालयात सोमवारी झालेल्या सुनावणी दरम्यान, सरन्यायाधीश एस. ए. बोबडे, न्यायमूर्ती ए. एस. बोपन्ना आणि न्यायमूर्ती वी. रामासुब्रमण्यम यांच्या खंडपीठानं निवडणूक आयोगाचा निर्णय रद्द ठरवला आहे. त्यामुळे कमलनाथ हे काँग्रेसच्या स्टार प्रचारकांच्या यादीत राहणार आहेत. निवडणूक आयोगाने आपल्या वैधानिक अधिकारांचं उल्लंघन केल्याचं कमलनाथ यांनी आपल्या याचिकेत स्पष्ट केल आहे. कमलनाथ यांनी आपल्या भाषणात भाजप उमेदवार इमरती देवी यांना आयटम संबोधले होते. तसेच शिवराज सिंह चौहान यांना नौटंकी कलाकार म्हटलं होतं. त्यामुळं निवडणूक आयोगाने कमलनाथ यांच्यावर कारवाईचा बडगा उगारला होता.
आदर्श आचारसंहितेचं उल्लंघन केल्याप्रकरणी निवडणूक आयोगाने काँग्रेसचे ज्येष्ठ नेते आणि मध्यप्रदेशचे माजी मुख्यमंत्री कमलनाथ यांना मोठा झटका दिला होता. निवडणूक आयोगाने कमलनाथ यांचं स्टार प्रचारकांच्या यादीतील नाव हटवलं होतं. त्यामुळे कमलनाथ मध्यप्रदेशातील पोटनिवडणुकीत प्रचार करू शकणार असले तरी त्यांच्या प्रचाराचा खर्च पक्षाला नाही तर उमेदवाराला द्यावा लागणार होता.
