जळगाव (प्रतिनिधी) एरंडोल येथे माजी उपनगराध्यक्ष दशरथ बुधा महाजन यांच्यावर झालेल्या हल्ल्याप्रकरणी स्थानिक गुन्हे शाखेने तपासचक्रे फिरवत तीन संशयित आरोपींना अटक केली आहे. दशरथ महाजन यांचा अपघात नव्हे तर घातपातच झाला असुन अपघाताचा बनाव करून तीघांनी जीवघेणा हल्ला केला असल्याची बाब पोलिस तपासातून निष्पन्न झाली असल्याची माहीती पोलीस अधिक्षक महेश्वर रेड्डी यांनी आयोजित पत्रकार परिषदेत दिली आहे. या घटनेमुळे जळगाव जिल्ह्यात एकच खळबळ उडाली आहे.
माजी नगरसेविका कल्पना दशरथ महाजन यांनी १४ जून रोजी एरंडोल पोलीस ठाण्यात तक्रार दाखल केली होती. त्यांचे पती दशरथ महाजन हे एरंडोल नगरपालिकेत माजी उपनगराध्यक्ष असल्याने त्यांचे शहरातील अनेक राजकीय लोकांशी मतभेद होते. त्यामुळे, त्यांच्यावर झालेला हल्ला हा अपघात नसून घातपात असल्याची शक्यता फिर्यादी आणि त्यांच्या नातेवाईकांनी वर्तवली होती.
एलसीबीच्या दोन पथकांनी फिरवली तपासचक्रे
या प्रकरणाचे गांभीर्य लक्षात घेऊन जळगावचे पोलीस अधीक्षक डॉ. महेश्वर रेड्डी यांनी हा गुन्हा स्थानिक गुन्हे शाखेकडे पुढील तपासासाठी वर्ग केला. त्यांच्या सूचनेनुसार, वरिष्ठ पोलीस निरीक्षक संदीप पाटील यांनी स्थानिक गुन्हे शाखेची दोन पथके तयार केली. या पथकांनी घटनास्थळाचा बारकाईने अभ्यास करून, तेथून ये-जा करणाऱ्या रस्त्यांवरील सीसीटीव्ही फुटेज तपासण्यास सुरुवात केली.
तीन्ही आरोपीकडून कबुली, वाहन जप्त
या प्रकरणी उमेश ऊर्फ बदक सुरेश सुतार (वय ४०), शुभम कैलास महाजन (वय १९), आणि पवन कैलास महाजन (वय २०) (सर्व रा. एरंडोल, ता. एरंडोल, जि. जळगाव) या तिन्ही आरोपींना स्थानिक गुन्हे शाखेच्या पथकाने शिताफीने ताब्यात घेतले. चौकशीदरम्यान, आरोपींनी गुन्ह्याची कबुली दिली आहे. आरोपी उमेश सुतार याने पूर्व वैमनस्यातून हा गुन्हा केल्याचे सांगितले. गुन्ह्यात वापरलेली महिंद्रा अँड महिंद्रा कंपनीची बोलेरो चारचाकी गाडी आरोपी उमेश सुतार याच्याकडून जप्त करण्यात आली आहे.
तीन दिवसाची कोठडी
तीन ही आरोपींना अटक करण्यात आल्यानंतर त्यांना एरंडोल न्यायालयात हजर करण्यात आले असुन न्यायालयाने त्यांना दि.३० पयरंत पोलीस कोठडी सुनावली आहे. या गुन्ह्यात आणखी कोणाचा सहभाग आहे का, याचा पोलीस सखोल तपास करत आहेत. स्थानिक गुन्हे शाखेचे पीएसआय सोपान गोरे हे तपास करत आहे.
या पथकाची कामगिरी
सदरची कार्यवाही पोलीस अधीक्षक डॉ. श्री. महेश्वर रेड्डी, अपर पोलीस अधीक्षक कविता नेरकर, तसेच उपविभागीय पोलीस अधिकारी विनायक कोते यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक संदीप पाटील, एरंडोल पो.नि.निलेश गायकवाड, पोलीस उपनिरीक्षक शरद बागल, पोलिस हवालदार सोपान गोरे, हरीलाल पाटील, संदीप पाटील, प्रविण मांडोळे, अक्रम, शेख, प्रविण भालेराव, रवि कापडणे, राहुल कोळी, जितेंद्र पाटील, भुषण पाटील, प्रशांत पाटील यांच्या पथकाने केली आहे.
सीसीटीव्हीचे ८ तास परिक्षण, अन् धागा गवसला
विशेष म्हणजे, ज्या दिवशी ही घटना घडली, त्या दिवशी वादळ आणि पावसामुळे अनेक ठिकाणी विद्युत पोल कोसळले होते, त्यामुळे सीसीटीव्ही फुटेज मिळवण्यात अडचणी येत होत्या. मात्र, तपास पथकातील प्रवीण मांडोळे आणि राहुल कोळी यांनी एका पेट्रोल पंपावरील सीसीटीव्ही फुटेजचे सलग ८ तास परीक्षण केले. या अथक प्रयत्नांमधून त्यांनी गुन्ह्यातील आरोपी निष्पन्न केले आणि हा अपघात नसून घातपात असल्याचे उघडकीस आणले.
