चोपडा (प्रतिनिधी) शहरातील बावल रस्त्यावरील स्वामी समर्थ केंद्राजवळ माजी आमदार चंद्रकांत सोनवणे हे कार्यक्रमानिमित्त आले होते. यावेळी तेथून जाणारे चोसाकाचे व्हॉइस चेअरमन एस. बी. पाटील यांनी माजी आमदारांना नमस्कार केला. या वेळी त्यांनी काहीही कारण नसताना शिवीगाळ व मारहाण केल्याची तक्रार एस. बी. पाटील यांनी पोलिसांत दिली. ही घटना २२ रोजी सायंकाळी ६ वाजेच्या सुमारास घडली.
शहरातील स्वामी समर्थ केंद्राजवळील करनदास नानजी दुकानाच्या बाहेर माजी आमदार चंद्रकांत सोनवणे उभे होते. तेथून शहरातील पंकज नगरमध्ये राहणारे चोसाकाचे व्हॉइस चेअरमन तथा कृती समितीचे समन्वयक एस. बी. पाटील हे जात असताना त्यांनी माजी आमदार सोनवणे यांना राम राम केला. त्याचा राग आल्याने तसेच काहीच कारण नसताना त्यांनी एस. बी. पाटील यांना शिवीगाळ करत कॉलर पकडून मारहाण केली. धमकी दिल्याचे तक्रारीत म्हटले आहे. या प्रकरणी एस. बी. पाटील यांच्या फिर्यादीवरून चोपड़ा शहर पोलिसांत माजी आमदार चंद्रकांत सोनवणे यांच्या विरोधात ३२३, ५०४, ५०६ अन्वये तक्रार दाखल करण्यात आली आहे. या घटनेचा तपास सहायक पोलिस निरीक्षक अजित सावळे करत आहेत.
