चंद्रपूर (वृत्तसंस्था) सासऱ्याच्या मृत्यूनंतर प्रॉपर्टीसाठी सासूसोबत वाद घालणाऱ्या मावशीच्या नवऱ्याची गळा कापून हत्या केल्याची घटना शुक्रवारी रात्री चंद्रपूर जिल्ह्यातील बल्लारपूर येथे घडली. या हत्येप्रकरणी मृतकाच्या साळीची मुलगी शिवानी बोधनवार (वय २३) व तिचा प्रियकर रघू झा (वय २८) आणि रघूचा मित्र तिवारी (वय २५) यांना अटक केली. विशाल दासरवार असे मृतकाचे नाव आहे.
या संदर्भात माध्यमांमध्ये प्रकाशित वृत्तानुसार शहरातील न्यू कॉलनी रोडस्थित महाराणा प्रताप वॉर्डात राहणारे शामराव कोडूरवार यांच्या मृत्यूनंतर घर व संपत्तीकरिता नेहमी वाद होत असे. शामराव यांना मुलगा नसून तीन मुली आहेत. तिन्ही मुलींचे लग्न झाले असून त्या शेजारीच राहतात, हे विशेष. त्यात दुसऱ्या नंबरचा जावई विशाल दासरवार हा रिकामटेकडा असून दारू पिऊन सासूसोबत प्रॉपर्टीसाठी वाद घालायचा. तसेच विशाल दारू पिऊन पत्नीसोबत वाद घालून तिला मारहाण करायचा.
२१ एप्रिलला तो नेहमीप्रमाणे दारू पिऊन घरी आल्यावर पत्नीसोबत वाद घालायला सुरुवात केली. त्या वादात प्रॉपर्टीचा मुद्दा निघाला. त्यावेळी विशालने साळीची मुलगी शिवानीला सुद्धा शिवीगाळ केली. वाद वाढू नये म्हणून विशालची पत्नी बहिणीच्या घरी गेली. परंतु शिवानीच्या मनात विशालप्रती राग होता. त्याच रात्री शिवानीने मित्र रघूला बोलावले. रघूने त्याचा मित्र तिवारीला बोलावले. त्यानंतर खाटेवर झोपून असलेल्या सहा फूट उंच व धाडधिप्पाड असलेल्या विशाल दासरवारचे हातपाय बांधून गळ्यावर शिवानीने ब्लेडने दोन वार केले तर तिचा प्रियकर रघूने तीन वार केले.
रघूचा मित्र घराबाहेर उभा होता. या हल्ल्यात विशालचा घटनास्थळीच मृत्यू झाला. त्यानंतर शनिवारी पहाटे ३ वाजता बल्लारपूर पोलिस ठाण्यात जाऊन शिवानीने आत्मसमर्पण करत विशालच्या खुनाची कबुली दिली. विशाल कुटुंबातील सदस्यांसोबत दारू पिऊन प्रॉपर्टीसाठी वाद घालत अश्लील शिवीगाळ करायचा. दररोजच्या त्रासाला कंटाळून एमबीएचे शिक्षण घेणाऱ्या शिवानीने हे भयावह पाऊल उचलले.
पोलिसांना शिवानीच्या कबुलीनाम्यावर संशय आहे. दुसऱ्या दिवशी बल्लारपूर पोलिसांनी शिवानीची चौकशी सुरू करत तिचा मोबाइल तपासून बघितला. मात्र शिवानीने मोबाइल फॉरमॅट केला असल्याने पोलिसांचा संशय बळावला. पोलिसांनी सायबर पोलिसांच्या मदतीने कॉल रेकॉर्ड्स बाहेर काढले. त्यानुसार तपास सुरू केला. सपोनि राजूरकर यांनी शिवानीची कसून चौकशी केली असता तिने यामध्ये तिचा प्रियकर व मित्रांचा सहभाग असल्याचे कबूल केले.
