जळगाव (देवेंद्र पाटील) सेवेलाही सुगंध असतो का? असतो. ही केवळ कवी कल्पना नाही. पृथ्वीतलावर काही माणसं इतरांच्या सुखासमाधनासाठीच काम करीत असतात. कुणाच्या चेहऱ्यावरचा आनंद हा त्यांना त्यांचा वैयक्तिक आनंद वाटतो. आपल्या एका शब्दाने कुणाला सकारात्मक ऊर्जा मिळत असेल तीसुद्धा मनोभावे देण्याचा ते प्रयत्न करीत असतात.
आपल्या कृतिशील आचरणातून जेही कार्य होत असेल ते इतरांच्या भल्याचेच होईल या ध्यासाने नेहमी सामाजिक बांधिलकी जोपासणाचा विचार मनात करीत असतात. सेवा करीत असताना त्यांच्या श्रमाचा-घामाचा त्यांच्या कर्तबगारीचा सुगंध सर्वदूर पसरतो. काही माणसं देत राहण्यासाठीच जन्माला आलेली असतात यातील आमच्या जवळच्या व्यक्तिमत्त्वापैकी एक असलेले आदरणीय श्री. अशोक भवरलालजी जैन अर्थात अशोकभाऊ. यांचा आज साठिमध्ये प्रवेश. वयाच्या याही उंबरठ्यावर अशोकभाऊचे व्यक्तीमत्त्व इतरांसाठी भविष्यदर्शी ठरत आहे. जो शेतकरी काळ्या आईची सेवाकरून बीज पेरतो ते अंकुरते. त्याचे रोप होते. झाड होते. त्यापासून मिळालेल्या प्रत्येक पाना-फुला-फळांचा आनंद आपण घेत असतो. या भूमिपुत्रांना डोळ्यांसमोर ठेऊन ‘चांगलं पेरत रहा एक ना एक दिवस नक्कीच चांगलं उगवते’ हा शेतकऱ्यांचा सद्गुण अशोकभाऊंच्या आचरणात दिसतो. आज्जी गौराई ज्याप्रमाणे वाकोद सारख्या खेडेगावात कनवळू मनाने तिथल्या आयाबायांना मदत करत असायच्या तो संस्कार श्रद्धेय मोठ्याभाऊंच्या कार्यसंस्कृतीमध्ये रूजला. साधारण परिस्थिती असतानाही दुसऱ्याची मदत करणे हा वसा आणि वारसा अशोकभाऊंसह संपूर्ण जैन परिवाराने व्रतस्थपणे पुढे नेत आहेत. समाजात चांगले घडण्यासाठी जे जे प्रयत्न करता येतील ते करण्यासाठी अशोकभाऊ नेहमी पुढाकार घेत असतात. अशा बहुआयामी व्यक्तिमत्वास वाढदिवसाच्या शुभेच्छा!
– देवेंद्र पंढरीनाथ पाटील
9673934618
