जळगाव (प्रतिनिधी) जळगावातील आणि इतर जिल्ह्यातील व्यापाऱ्यांचा विश्वास संपादन करून सुमारे ६० लाख २२ हजारांची फसवणूक केल्याचा प्रकार समोर आला आहे. व्यापाऱ्याकडून होलसेल भावात इलेक्ट्रॉनिक्सच्या वस्तू घेवून जात होते. याप्रकरणी जळगाव शहर पोलीस ठाण्यात निलेश शांताराम पाटील व दिनेश पाटील या दोघांविरुद्ध गुन्हा दाखल करण्यात आला आहे.
यासंदर्भात अधिक असे की, शहरातील डेमला कॉलनीतील रहिवासी महेंद्र सतिषचंद्र ललवाणी यांचे जी. एस. ग्राऊंडजवळ समर एजन्सीज नावाचे इलेक्ट्रॉनिक्स साहित्य विक्रीचे दुकान आहे. दरम्यान निलेश शांताराम पाटील व दिनेश पाटील या दोघांनी सन २०१३ मध्ये श्री इलेक्ट्रॉनिक्स शॉपी नावाने नाथप्लाझा येथे दुकान सुरु केले होते. हे दोघ ललवाणी यांच्याकडून होलसेल भावात इलेक्ट्रॉनिक्सच्या वस्तू घेवून जात होते. त्यांनी ३१ जुलै २०१३ ते ३१ मार्च २०२१ पर्यंत इलेक्ट्रॉनिक्स वस्तू घेवून रोख व उधारीने घेवून जात होते. काही वेळा रोख तर काही वेळा उधारीने वस्तू घेवून जात असल्याने त्यांनी ललवाणी यांचा विश्वास संपादन केला. दरम्यान त्यांच्याकडे सुमारे ११ लाख ८६ हजार ७३ रुपये बाकी आहेत. त्यांना बाकी असलेल्या पैशांसाठी फोन करून व त्यांच्या घरी जावून मागणी केली असता, त्यांच्याकडून पैसे देण्यास टाळाटाळ केली जात होती.
महेंद्र ललवाणी यांनी निलेश व दिनेश पाटील या दोघांबद्दल मार्केटमध्ये विचारपूस केली असता, त्यांना अनेक व्यापाऱ्यांचे त्यांच्याकडे पैसे असल्याची धक्कादायक माहिती त्यांना समजली. त्यामुळे ललवाणी यांच्यासह अनेक व्यापाऱ्यांना दोघांनी लाखो रुपयांचा गंडा घातला आहे. भुसावळ, धुळे, पुणे आणि जळगावातील काही व्यापाऱ्यांना एकुण ६० लाख २२ हजार ६४३ रुपयांची फसवणूक केल्याचे समोर आले. याप्रकरणी महेंद्र ललवाणी यांनी दिलेल्या फिर्यादीवरून जळगाव शहर पोलीस ठाण्यात निलेश शांताराम पाटील व दिनेश शांताराम पाटील (दोघ रा. प्लॉट नंबर १२ भुरेमामलेदार प्लॉट, शिवाजीनगर) या दोघांविरुद्ध फसवूणकीचा गुन्हा दाखल करण्यात आला आहे.
