जळगाव (प्रतिनिधी) ‘भावी मुख्यमंत्री अजितदादा’ असा उल्लेख असलेले मोठे होर्डिंग्ज शहरातील विविध भागात झळकल्याने राजकीय वर्तुळात पुन्हा एकदा जोरदार चर्चा रंगली आहे.
22 ज्युलै रोजी राज्याचे उपमुख्यमंत्री व राष्ट्रवादीचे नेते ना. अजितदादा पवार यांचा वाढदिवस साजरा होत आहे. त्यातच जळगाव शहरात अजितदादा यांचे निकटवर्तीय असलेले राष्ट्रवादीचे प्रदेश प्रवक्ते योगेश देसले व जिल्हा उपाध्यक्ष बंगालसिह चितोडीया यांनी विविध चौकात लावलेल्या होर्डिंग्जवर अजितदादा पवार यांचा भावी मुख्यमंत्री म्हणून उल्लेख केल्याने राजकीय क्षेत्रातील अनेकांच्या भुवया उंचावल्या आहेत. अजितदादा सत्तेत सहभागी झाल्यामुळे पुढील महिन्यात ते मुख्यमंत्री होतील, असा विश्वास कार्यकर्त्यांना वाटत आहे.
पुण्यातील एका कार्यक्रमात अजित पवार यांनी मुख्यमंत्री पदाबाबत विचारण्यात आले. त्यावेळी मला मुख्यमंत्री व्हायला आवडेल, असे म्हटले होते. तेव्हापासून त्यांची मुख्यमंत्री पदाची चर्चा जोर धरुन आहे. सध्या राज्याचे राजकारण हे मुख्यमंत्रीपद या एकाच विषयाभोवती फिरताना दिसत आहे. यामुळे उपमुख्यमंत्री अजित पवार हे आता मुख्यमंत्री व्हावेत, यासाठी मोर्चेबांधणी सुरु झाली आहे का?, अशीही चर्चा सध्या राजकीय वर्तुळात सुरु आहेत. दरम्यान, या होर्डिंग्जवर शरद पवार यांचाही फोटो असल्यामुळे अनेकांच्या भुंवया उंचावल्या आहेत.
