जळगाव (प्रतिनिधी) – घराजवळच राहणाऱ्या मित्राच्या घरी दुरुस्तीसाठी गेलेल्या योगेश उर्फ भैय्या शिवाजी वाघ (वय ४३, रा. पिंप्राळा) या शिवसेना ठाकरे गटाच्या विभाग प्रमुखाचा विजेचा शॉक लागून दुर्दैवी मृत्यू झाला. ही घटना बुधवार दि. २८ ऑक्टोंबर रोजी दुपारी साडेबारा वाजेच्या सुमारास घडली. घटनेची माहिती मिळताच त्यांच्या नातेवाईकांसह मित्रांनी जिल्हा रुग्णालयात मोठी गर्दी केली होती. घरातील कर्ता व्यक्तीच्या मृत्यूमुळे त्यांच्या कुटुंबावर दुःखाचा डोंगर कोसळला आहे. याप्रकरणी रामानंद नगर पोलिसात अकस्मात मृत्यूची नोंद करण्यात आली.
शहरातील पिंप्राळा परिसरात राहणारे शिवसेना ठाकरे गटाचे विभाग प्रमुख योगेश उर्फ भैय्या वाघ हे कुटुंबियांसह वास्तव्यास आहे. ते इलेक्ट्रीशीयन असून बुधवारी सकाळच्या सुमारास ते त्याच परिसरात राहणाऱ्या सतिष मोरे यांच्याकडे दुरुस्तीच्या कामासाठी गेले होते. घरातील इलेक्ट्रीक बोर्डमध्ये दुरुस्तीचे काम करीत असतांना अचानक त्यांना विजेचा जोरदार शॉक लागून ते खाली कोसळले. दरम्यान, ही घटना मोरे कुटुंबियांच्या लक्षात येताच त्यांनी परिसरातील नागरिकांच्या मदतीने योगेश वाघ यांना तात्काळ जिल्हा शासकीय वैद्यकीय महाविद्यालय व रुग्णालयात दाखल केले. याठिकाणी डॉक्टरांनी तपासणी करीत त्यांना मयत घोषीत केले.
नातेवाईकांसह मित्रांची जिल्हा रुग्णालयात गर्दी
शॉक लागून योगेश वाघ यांचा दुर्देवी मृत्यू झाल्याची माहिती मिळताच त्यांच्या नातेवाईकांसह शिवसेना जिल्हा प्रमुख कुलभुषण पाटील यांच्यासह शिवसेनेच्या पदाधिकारी, कार्यकर्ते व मित्र परिवाराने जिल्हा रुग्णालयात धाव घेतली होती. प्रत्येकाच्या मदतीसाठी धावून येणारा आणि मनमिळावू स्वभाव असलेल्या योगेश वाघ यांचा दुर्देवी मृत्यूने पिंप्राळा परिसरात हळहळ व्यक्त केली जात आहे. १८ दिवस मुलगा होता कोमात योगेश वाघ यांच्या पश्चात
आई, वडील, पत्नी आणि दोन मुले असा परिवार आहे. दोन वर्षापुर्वी त्यांची पत्नी आणि मोठा मुलगा दर्शन यांचा कुसुंब्याजवळ अपघात झाला होता. यामध्ये दर्शनच्या डोक्याला गंभीर दुखापत होवून त्यावेळेस तो तब्बल १८ दिवस कोमात होता. तर लहान मुलगा जय हा ११ वर्षाचा असून तो आळंदी येथे वारकरी संप्रदायाचे शिक्षण घेत आहे. घरातील कर्त्या व्यक्तीवर दुर्देवी काळाने झडप घातल्यामुळे वाघ कुटुंबियांवर दुःखाचा डोंगर कोसळला आहे.
मृत्यूच्या वार्ता ऐकताच कुटुंबियांना मानसिक धक्का
सकाळी नेहमीप्रमाणे योगेश वाघ हे कामासाठी घरातून बाहेर पडल्यानंतर त्याच परिसरातील मंदिरात दर्शन घेत होते. त्यानंतर त्याच राहणारा त्यांचा जिवलग मित्र भोला राजपूत याला भेटूनच पुढील कामासाठी मार्गस्थ होत असल्याचा त्यांचा नित्यक्रम होता. बुधवारी सकाळी देखील ते भोला राजपूतला भेटून सतिष मोरे यांच्या घरी इलेक्ट्रीक दुरस्तीचे काम करण्यासाठी गेले. परंतू शॉक लागून त्यांच्या मृत्यूची बातमी दुपारी समजल्याने कुटुंबीयांना मोठा धक्का बसला होता. आई वडीलांचा एकुलता एक आधार गेल्यामुळे त्यांना देखील अश्रू अनावर झाले होते.
