जळगाव प्रतिनिधी । बकऱ्या चोरतांना चोरट्यांना रंगेहात पकडत असतांना चोरट्यांनी लोखंडी हत्याराने वार केल्याने जमीन युसूफ शेख (वय ४७, रा. शिवाजीनगर) हे जखमी झाल्याची घटना रविवारी ४ ऑगस्ट रोजी शिवाजी नगरात घडली आहे. याप्रकरणी शहर पोलीस ठाण्यात गुन्हा दाखल करण्यात आला आहे.
याबाबत अधिक माहिती अशी की, शहरातील शिवाजी नगरातील बोहरा मस्जीदसमोर जमील युसूफ शेख हे वास्तव्यास असून ते बकरी पालनासह खरेदी विक्रीचा त्यांचा व्यवसाय आहे. त्यांनी घरासमोरील जागेवर त्यांच्या बकऱ्या बांधलेल्या होत्या. ४ ऑगस्ट रोजी सकाळी साडेदहा वाजेच्या सुमारास घराच्या गॅलरीत पाणी घेण्यासाठी गेले असता, त्यांना बकऱ्या बांधलेल्या ठिकाणी त्यांना (एमएच ०५, एएक्स ७८९८) क्रमांकाची कार उभी दिसली. तसेच दावणीला बांधलेल्या दोन बकऱ्या गाडीजवळ उभ्या होत्या आणि गाडीचे दोन्ही दरवाजे उघडे असल्याचे त्यांना दिसले. त्यामुळे जमील शेख यांना संशय आला आणि ते घाईघाईने खाली उतरले. दरम्यान, चोरट्यांनी एक बकरी चारचाकी वाहनात टाकली होती तर दुसरी वाहनात टाकत होते.
चोरटे बकरी गाडीत टाकत असतांना जमील शेख यांनी ड्रायव्हरच्या बाजूला बसलेल्या इसमाची मान पकडून त्याला गाडीच्या खाली ओढत होते. त्यावेळी त्या चोरट्याने शेख यांच्या हातावर लोखंडी हत्याराने मारले. शेख यांनी चोरट्याची मान घट्ट पकडून ठेवल्यामुळे गाडीच्या चालकाने गाडी सुरु करीत शेख यांना काही अंतरापर्यंत फरफटत नेले आणि चोरटे तेथून शिवाजीनगर उड्डाणपुलाच्या दिशेने पळून गेले. यावेळी चोरट्यांनी चारचाकीतून २० हजारांच्या दोन बकऱ्या चोरुन नेल्या. याप्रकरणी शहर पोलीस ठाण्यात गुन्हा दाखल करण्यात आला.
