नवी दिल्ली (वृत्तसंस्था) युद्धामुळे भारतीय बाजारात सोन्यासह चांदीच्या दरात मोठी वाढ झाली आहे. दरम्यान, आंतरराष्ट्रीय बाजारासह भारतीय बाजारातही सोने दरात सोमवारी अचानक मोठी तेजी आली आहे. आंतरराष्ट्रीय बाजारात सोनं 2000.69 डॉलरवर पोहोचलं आहे. हा दर मागील 18 महिन्यातील सर्वोच्च दर आहे.
आंतरराष्ट्रीय बाजारातील तेजीमुळे भारतीय बाजारातही MCX वर सोन्याचा वायदे भाव 1.8 टक्क्यांच्या तेजीसह 53,500 रुपये प्रति 10 ग्रॅमवर पोहोचला आहे. सोन्यासह चांदीच्या दरातही मोठी वाढ झाली आहे. MCX वर चांदी 1.5 टक्क्यांच्या वाढीसह 70173 रुपये प्रति किलोग्रॅमवर आहे. गुंतवणुकदार सोन्याप्रमाणेच चांदीमध्ये मोठी गुंतवणूक करत आहेत, त्यामुळे चांदीचा भावही वधारला असल्याचं आयआयएफएल सिक्योरिटीजचे उपाध्यक्ष अनुज गुप्ता यांनी सांगितलं.
रशिया – युक्रेनमधील युद्धामुळे जगभरातील आर्थिक बाजारपेठांमध्ये निर्माण झालेल्या अनिश्चिततेमुळे गुंतवणुकदार जोखमीच्या पर्यायांमध्ये गुंतवणूक टाळत आहेत. त्यामुळे सुरक्षित गुंतवणूक म्हणून सोन्याकडे मोठा कल आहे. युद्धामुळे अनेक गुंतवणुकदारांनी गोल्ड ETF मध्ये मोठी गुंतवणूक केली, त्यामुळे सोने दरात आणखी मजबूती आली आहे.
