धरणगाव (प्रतिनिधी) – धरणगाव नगरपरिषद हद्दीतील नागरिकांच्या मूलभूत सुविधा आणि शहराच्या सर्वांगीण विकासासाठी प्रस्तावित असलेल्या विविध ६५ विकासकामांना प्रशासकीय मंजुरी मिळून निधी उपलब्ध व्हावा, यासाठी आज धरणगाव नगरपरिषदेच्या लोकनियुक्त नगराध्यक्षा लीलाताई चौधरी यांच्या विविध कामांच्या मागणी पत्रावर त्यांच्या सर्व नगरसेवकांनी जळगाव जिल्ह्याचे पालकमंत्री तथा पाणीपुरवठा व स्वच्छता मंत्री ना. श्री. गुलाबरावजी रघुनाथ पाटील यांची भेट घेतली. या भेटीदरम्यान पालकमंत्र्यांनी या कामांना लवकरच मंजुरी व निधी मिळवून देण्याचा सकारात्मक शब्द दिला आहे.
जिल्हाधिकाऱ्यांकडील प्रशासकीय मान्यता प्रलंबित
धरणगाव नगरपरिषद हद्दीत सन २०२५-२६ या वित्तीय वर्षात जिल्हा वार्षिक योजनेअंतर्गत एकूण ६५ विविध विकास कामे प्रस्तावित करण्यात आली होती. या कामांना महाराष्ट्र जीवन प्राधिकरण विभाग, जळगाव यांच्याकडून तांत्रिक मंजुरी मिळालेली आहे. मात्र, जिल्हाधिकारी कार्यालय जळगावकडून अद्याप प्रशासकीय मान्यता मिळालेली नसल्याने या कामांना गती मिळालेली नव्हती. याच पार्श्वभूमीवर गटनेत्यांच्या शिष्टमंडळाने पालकमंत्र्यांची भेट घेतली.
पालकमंत्र्यांची भेट घेणाऱ्या शिष्टमंडळात गटनेते निलेश चौधरी यांच्यासह नगरसेवक लक्ष्मण माळी, सुनील चौधरी, परमेश्वर महाजन, भागवत चौधरी, हेमंत महाजन, लक्ष्मण पाटील, किरण अग्निहोत्री, भूषण शिरसाठ आणि अमोल चौधरी आदी लोकप्रतिनिधी उपस्थित होते.
निवेदनात समावेश
रस्ते काँक्रिटीकरण
खत्री गल्ली, पाताल नगरी, भावसार गल्ली, संजय नगर, महाराणा प्रताप नगर, गौतम नगर, मातोश्री नगर यांसह शहरातील विविध भागांत सुमारे ४५ हून अधिक रस्ते कॉंक्रिटीकरणाची कामे.
गटार व नाला बांधकाम
संजय नगर, मातोश्री नगर, गौतम नगर परिसरात काँक्रीट गटार व सोनवद रस्त्यावरील नाल्याचे बांधकाम.
स्मशानभूमी व नागरी सुविधा
पिंपळे रोड गिरणा कॅनलजवळील स्मशानभूमीत शेड व संरक्षण भिंत बांधणे, चोपडा रस्त्यावरील दादाजी कुटीया स्मशानभूमीची जागा हस्तांतरित करून नवीन स्मशानभूमी विकसित करणे.
शाळा व शॉपिंग कॉम्प्लेक्स
मराठी शाळा नंबर १ ची जागा नगरपरिषदेकडे हस्तांतरित करून तेथे नवीन शाळेसह भव्य शॉपिंग कॉम्प्लेक्स उभारणे.
पाणीपुरवठा व इतर कामे
पिंप्री येथील पंपिंग स्टेशनला वॉल कंपाउंड करणे, बालाजी नगर भागात पेव्हर ब्लॉक व बेंचेस बसवणे आणि मच्छी मार्केटसाठी ओटे बांधणे.
*वाढत्या लोकसंख्येसाठी नवीन फिल्टर प्लांटची मागणी या निवेदनात शहराच्या भविष्यातील पाणीपुरवठ्याचा महत्त्वाचा प्रश्नही मांडण्यात आला. धरणगाव शहराची लोकसंख्या झपाट्याने वाढत आहे. सध्या अस्तित्वात असलेला फिल्टर प्लांट या वाढीव लोकसंख्येमुळे अपूर्ण पडत असून, नागरिकांना पुरेसा पाणीपुरवठा करण्यात अडचणी येत आहेत. त्यामुळे शहराची वाढती गरज लक्षात घेता, नवीन फिल्टर प्लांट नव्याने वाढवून मंजूर करून देण्यात यावा अशी आग्रही विनंती शिष्टमंडळाने पाणीपुरवठा मंत्री ना. गुलाबराव पाटील यांच्याकडे केली.
पालकमंत्र्यांचे सकारात्मक आश्वासन
धरणगाव शहराच्या विकासाला गती देण्यासाठी आणि नागरिकांना दिलासा देण्यासाठी ही मूलभूत कामे अत्यंत आवश्यक आहेत. पालकमंत्री गुलाबराव पाटील यांनी निवेदनाचा स्वीकार करत, या सर्व कामांना व फिल्टर प्लांटच्या प्रस्तावाला लवकरात लवकर प्रशासकीय मंजुरी प्रदान करून आवश्यक निधी उपलब्ध करून देण्याबाबत संबंधित विभागाला योग्य त्या सूचना केल्या जातील, असा ठाम शब्द शिष्टमंडळाला दिला. पालकमंत्र्यांच्या या सकारात्मक प्रतिसादामुळे धरणगाववासीयांच्या आशा पल्लवित झाल्या आहेत.
