वरणगाव (प्रतिनिधी): ओम सिद्धगुरु नित्यानंद प्रतिष्ठान संचलित रेवा कुटी, वरणगाव येथे वासुदेव परिवारातर्फे हनुमान जन्मोत्सव विविध धार्मिक उपक्रमांनी उत्साहात साजरा करण्यात आला.
कार्यक्रमाची सुरुवात पहाटे ५ वाजता गणेश आराधना व प्रभू श्रीराम स्तुतीने झाली. त्यानंतर हनुमान चालीसाच्या प्रत्येक ओवीचे सामूहिक पठण करण्यात आले. या वेळी प्रत्येक ओवीसोबत हवनही करण्यात आले. विशेष म्हणजे, प्रत्येकी ११ अशा एकूण ४४१ संगीतमय हनुमान चालीसा पाठांचे आयोजन करण्यात आले. तसेच हवनादरम्यान एकूण १६,८८० आहुती देण्यात आल्या.
या धार्मिक सोहळ्यात तुकाराम पाटील, वैशाली पाटील, पेचिमुत्थु नाडर, सिल्वराणी नाडार, डॉ. रवींद्र माळी, विवेक पाटील, सुलोचना पाटील, डॉ. रेणुका पाटील, दीपक फेगडे, मनोज गोसावी, उमेश माळी, कमलेश येवले, कुणाल शिंदे, ज्ञानेश्वर पाटील, चंद्रकांत बढे, बाळकृष्ण चव्हाण, दिनकर पाटील, प्रकाश पाटील, सुचिता येवले, सुनंदा येवले, प्रतीक बोरणारे, श्लोक बोरणारे, आशिष येवले, वेदांत पाटील, दुर्वांग पाटील, गौरी येवले, सतीश जंगले, राहुल माळी, सुनीता चौधरी, चेतन झोपे, आकाश भंगाळे, सारंग जोशी, अनिकेत चव्हाण आदी भाविक मोठ्या संख्येने सहभागी झाले होते.
कार्यक्रमाच्या शेवटी प्रसाद भोजनाचे आयोजन करण्यात आले असून, आभार प्रदर्शन दीपक फेगडे यांनी केले.
राम सेतू दगडाचे आकर्षण
हनुमान जन्मोत्सवाच्या निमित्ताने भाविकांसाठी प्रभू श्रीरामांच्या पदस्पर्शाने पावन झालेला राम सेतू दगड दर्शनासाठी ठेवण्यात आला होता. सुमारे ७ हजार वर्षांपूर्वीच्या रामायणकालीन हा दगड आजही पाण्यात तरंगतो, असे सांगितले जाते. या दगडाचे दर्शन घेण्यासाठी भाविकांनी मोठी गर्दी केली होती. तसेच या तीर्थाचे प्राशन करून भक्तांनी समाधान व्यक्त केले.
— कमलेश येवले, सदस्य, वासुदेव परिवार, वरणगाव
भाविकांचा उत्साह वाढतच आहे
दर महिन्याच्या दुसऱ्या शनिवारी सुरू केलेल्या संगीतमय हनुमान चालीसा पठण उपक्रमाला यंदा वर्षपूर्ती झाली आहे. भाविकांचा वाढता उत्साह आमच्यासाठी संजीवनीसारखा असून, आगामी काळात हा उपक्रम अधिक व्यापक करण्याचा मानस आहे.
— राहुल माळी, सदस्य, वासुदेव परिवार, वरणगाव
