नवी दिल्ली (वृत्तसंस्था) राजस्थानमधील अलवर मध्ये एक विचित्र आणि कौटुंबिक हिंसाचाराचा धक्कादायक प्रकार समोर आला आहे. येथे राहणाऱ्या एका शाळेच्या मुख्यध्यपकाची पत्नी पतीची धुलाई करत असून पत्नीच्या छळाला कंटाळून पतीने थेट न्यायालयामध्ये धाव घेतली आहे. पुरावा म्हणून पत्नी मारहाण करतानाचे सीसीटीव्ही व्हिडीओ देखील पतीने न्यायालयामध्ये सादर केले आहेत. न्यायालयानेही त्यांना सुरक्षा पुरवा असे आदेश पोलिसांनी दिले आहेत.
अजित यादव हे मुख्याध्यापक असून अलवरमधील भिवाडी येथे पत्नी आणि मुलासह राहतात. वर्षभरापासून पत्नी मानसिक आणि शारीरिक छळ करत आहे. शेवटी अती झाल्याने त्यांनी घरामध्ये सीसीटीव्ही लावले. हेच सीसीटीव्ही फुटेज घेऊन ते न्यायालयामध्ये गेले आणि न्यायालयानेही त्यांना तातडीने सुरक्षा पुरवण्याचे आदेश दिले आहेत. मुख्याध्यापकांनी न्यायालयात पुरावा म्हणून सादर केलेल्या व्हिडीओमध्ये त्यांची पत्नी त्यांना बॅट आणि तव्याने मुलासमोरच मारहाण करताना दिसतेय.
अजित यादव हे एका खासगी शाळेमध्ये मुख्याध्यापक म्हणून कार्यरत असून नऊ वर्षांपूर्वी हरयाणातील सोनीपतमधील सुमन नावाच्या तरुणीशी त्यांनी प्रेमविवाह केला होता. दोघांना आठ वर्षाचा एक मुलगाही आहे. लग्नानंतर नव्याचे नऊ दिवस संपल्यावर सुमनने अजित यादव यांचा छळ करण्यास सुरुवात केली. दिवसेंदिवस त्रास वाढू लागल्याने अखेर अजित यांनी भिवाडी न्यायालयामध्ये धाव घेत आणि आपल्यावर होत असलेल्या अत्याचाराचा पाढा वाचला.
सीसीटीव्ही फुटेज केले सादर
मुख्याध्यापक अजित यादव यांनी सीसीटीव्ही फुटेजद्वारे पत्नीच्या मारहाणीचे व तोडफोडीचे पुरावे न्यायालयात सादर केले. पत्नी रोज मारहाण करते. गेल्या एक वर्षापासून हा प्रकार सातत्याने सुरू आहे. प्रथम लज्जेच्या भीतीने त्यांनी तक्रार केली नाही. परंतु पत्नीच्या वाढत्या अतिरेकाला कंटाळून कायद्याची मदत घेण्याचे ठरवले.
