बीड (वृत्तसंस्था) शाळा सुरु होणार असल्याने शिक्षक मित्राला सोडण्यासाठी पंढरपूरला निघालेल्या दोन मित्रांच्या दुचाकीला बीड तालुक्यातील पालीच्या घाटात भीषण अपघात झाला. यात शिक्षकाचा जागीच मृत्यू झाला तर दुसरा मित्र हेल्मेट असल्यामुळे सुदैवाने बचावला.
दामोधर महादेव डाकोरे (वय ३७ रा. चोंडी ता. पातूर जि. अकोला) असे मयत शिक्षकाचे नाव असून सतीश गजानन झाटे (वय २४ रा. आस्टूल, ता. पातूर जि. अकोला) हे जखमी आहेत. दामोधर व सतीश हे जीवलग मित्र आहेत. दामोधर हे पंढरपूर जिल्ह्यात शिक्षक असून शाळा सुरु होणार असल्याने ते जात होते. त्यांना सोडण्यासाठी सतीश हे देखील सोबत होते.
बुधवारी दुपारी पालीच्या घाटात लोडिंग ट्रकला पाठीमागून दुचाकीने जोराची धडक दिली. यात सतीश दुचाकी चालवत होते, आणि डोक्याला हेल्मेट असल्याने त्यांच्या डोक्याला कमी मार लागला. परंतु दामोधर हे पाठीमागे बसलेले असल्याने आणि ट्रकवर डोके आदळल्याने त्यांचा जागीच मृत्यू झाला. दरम्यान, सतीश यांची प्रकृती चिंताजनक असल्याचे सांगण्यात येत आहे.
