धरणगाव (प्रतिनिधी) येथील पारधीवाडा परिसरातील एका घराचे बांधकाम सुरु असताना एका बांधकाम मजुराला विजेचा धक्का बसून मृत्यू झाला. परमेश्वर रतीलाल चव्हाण (वय ३६) असे मयत बांधकाम मजुराचे नाव आहे. दरम्यान, सकाळी घरात पत्नी आणि मुलांसोबत गप्पा मारून कामावर गेल्यावर अवघ्या काही वेळात निधन वार्ता धडकल्यानंतर पत्नीसह मुलांनी मन हेलावून सोडणारा आक्रोश केला.
या संदर्भात अधिक असे की, दि. १० रोजी सकाळी ८ वाजेच्या सुमारास परमेश्वर रतीलाल चव्हाण हे घरासमोरील मिराबाई बाप संतोष पारधी यांचे घराचे बांधकाम सुरु असलेल्या ठिकाणी कामावर गेले होते. परमेश्वर घरावरील गच्चीवर प्लास्टर करीत असतांना अचानक घरावरुन गेलेल्या इलेक्ट्रिक तारांचा शॉक जागीच कोसळला. सहकारी मिस्त्रीनी तात्काळ त्यांच्या दिशेने धाव घेतली. परमेश्वर काही एक हालचाल करीत नव्हता. तसेच त्याचा डावा हात काळपट झालेला होता. त्यामुळे त्यास लागलीच खाजगी वाहनाने धरणगाव ग्रामिण रुग्णालय उपचारासाठी दाखल करण्यात आले. परंतू डॉक्टरांनी तपासून त्यास मयत घोषीत केले. या प्रकरणी पंकज चव्हाण यांच्या खबरीवरून अकस्मात मृत्यूची नोंद करण्यात आली आहे. पुढील तपास पो.ना. प्रमोद पाटील हे करीत आहेत. दरम्यान, पत्नीसह तिघां मुलांचा मन हेलावून सोडणारा आक्रोश बघून उपस्थितांच्या डोळ्यातही पाणी आले होते.
