छत्रपती संभाजीनगर (वृत्तसंस्था) बकरी ईदनिमित्त सुटी असल्याने चुलत, मामेभावासोबत खेळण्यासाठी गेलेल्या एका १५ वर्षीय मुलाचा तलावात बुडून मृत्यू झाल्याची दुर्दैवी घटना घडली आहे. फरदीन जाकेर खान पिंजारी, असे मृत मुलाचे नाव आहे.
या संदर्भात अधिक असे की, फरदीन कुटुंबासह गारखेड्यातील भारतनगरमध्ये राहत होता. गुरुवारी बकरी ईद असल्याने घरात आनंदाचे वातावरण होते. फरदीन व त्याच्या भावंडांनी बाहेर फिरण्याचे ठरवले. घरच्यांना तसे सांगून ते घराबाहेर पडले. सहा वाजेच्या ते सुमारास देवळाई परिसरात गेले. फरदीनला पोहता येत नसल्याने तो तलावात खोल बुडाला. घाबरलेल्या भावांनी घरी फोन करून प्रकार सांगितल्यानंतर त्या दिशेने सर्वांनी धाव घेतली. रात्री दहा वाजता मृतदेह बाहेर काढण्यात आला. मृतदेह बघितल्यानंतर घरच्यांनी एकच हंबरडा फोडला होता.
