औरंगाबाद (वृत्तसंस्था) राज्याचे गृहमंत्री अनिल देशमुख सध्या एका फोटोमुळं चांगलेच चर्चेत आले आहेत. या फोटोच गृहमंत्र्यांच्या शेजारी उभ्या असलेल्या तिघांवर गंभीर गुन्हे दाखल आहेत. अनिल देशमुख औरंगाबाद दौऱ्यावर असतानाचा हा फोटो आहे. हा फोटो व्हायरस झाल्यानंतर गृहमंत्र्यांना विरोधकांनी घेरलं आहे. मी औरंगाबादला दौऱ्यावर होतो. दौऱ्यावर असताना हजारो लोक भेटण्यासाठी येत असतात, निवेदन देत असतात, अशावेळी कोणती व्यक्ती, त्याचा काय व्यवसाय याची माहिती नसते. पण यापुढे अवश्य दक्ष राहिन, असं गृहमंत्र्यांनी स्पष्टीकरण दिलं आहे.
राज्याचे गृहमंत्री अनिल देशमुख सध्या चर्चेत असून औरंगाबाद दौऱ्यातील एक फोटो सध्या चर्चेचा विषय ठरला आहे. या फोटोमध्ये अनिल देशमुखांसोबत तीन गुन्हेगार उपस्थित असल्याने विरोधकांकडून टीका केली जात आहे. अनिल देशमुख यांच्यासोबत असणाऱ्या तिघांवरही गंभीर गुन्हे दाखल असल्याने या फोटोवरुन आश्चर्य व्यक्त केलं जात आहे. अनिल देशमुख गृहमंत्री असल्याने याकडे अधिक गांभीर्याने पाहिलं जात आहे. दरम्यान अनिल देशमुख यांनी यावर स्पष्टीकरण दिलं आहे. “मी औरंगाबादला दौऱ्यावर गेलो होतो. दौऱ्यावर गेल्यानंतर हजारो लोक भेटण्यासाठी येत असतात, निवेदन देत असतात. अशावेळी कोणती व्यक्ती, त्याचा काय व्यवसाय याची माहिती नसते. पण अवश्य यापुढे दक्ष राहीन,” असं अनिल देशमुख यांनी प्रसारमाध्यमांशी बोलताना म्हटलं आहे. गृहमंत्र्यांच्यासोबत व्हायरल होणाऱ्या फोटोतील दोन जण एमआयएमचे माजी नगरसेवक आहेत. तर, एकाची एमआयएमनं पक्षातून हकालपट्टी केली असून तिघांवर शहरातील वेगवेगळ्या पोलिस ठाण्यात गुन्हे दाखल आहेत. कलीम कुरेशी, सय्यद मतीन आणि जफर बिल्डर अशी त्यांची नावं आहेत.
दरम्यान, गृहमंत्र्यांच्या या फोटोवरुन भाजपच्या नेत्या चित्रा वाघ यांनी जोरदार टीका केली आहे. एक ट्विट करत त्यांनी ‘हे कसले रक्षक हे तर नराधमांना पाठीशी घालणारे भक्षक’, असं म्हणत गृहमंत्र्यांवर निशाणा साधला आहे.
